තවමත් පවතින ලොව ඉපැරණිම හමුදාව

නිල ධජය

මධ්‍යතන යුගයේ අවසාන භාගය (ක්‍රි.ව. 1300 -1500) වන විටත් ස්විට්සර්ලන්තය (Switzerland) දිළිඳුකමේ ගිලී පැවති රටක් විය. විරැකියාවද ඉතා ඉහළ මට්ටමක තිබුණි. කර දඬු උස්මහත්වී තමන් විසින් තමන් යැපිය යුතු වයසට පැමිණි ස්විස් තරුණයෝ රැකියා විරහිතව උකටලීව උන්හ. නමුත් ඔවුන්ට තෝරාගැනීමට එකම මඟක් ඉතිරිව තිබුණි. ඒ ස්විස් කුලී හමුදාවට බැඳී තමුන් නොදන්නා රටක් වෙනුවෙන් යුද්ධයට යාමයි. අඟ හිඟකම් ඉහවහා ගිය සමයක, යුද්ධයෙන් නොමැරුනොත් බඩගින්නේ මැරෙන්න වෙන සමයක හිත හිතා සිටීමෙන් පලක් නොවන බව තේරුම්ගත් බොහෝ තරුණයෝ ස්විස් කුලී හමුදාවට බැඳුනහ. මේ ඔවුන්ගේ කතාවයි.

ඉතා දරුණු සටන් කරුවන්වූ ස්විට්සර්ලන්ත කුලී හේවායෝ

මෙකල මුළු යුරෝපය පුරා දරුණු වශයෙන් යුද්ධයන් ඇවිලී ගිය වකවානුවක් විය.  සියවසරක යුද්ධය ( Hundred Years War) හා අනෙකුත් යුද්ධයන් යුරෝපය වසාගනිද්දී යුරෝපීය පාලකයෝ හුරුපුරුදු යුධෝපක්‍රම අතැර අලුත් යුධෝපක්‍රමයකට යොමුවූහ. නගුල්, කැති ආදී ගෙදර දොරේ ආම්පන්න රැගත් කම්කරුවන් සමඟ සීමිත ප්‍රමාණයක්වූ සොල්දාදුවන් යොදවා කල යුද්ධය යල්පැන ගියේය. ඒ වෙනුවට යුද්ධයේ හපන් තම සොල්දාදුවන්ට වඩා පුහුණුවේ හා යුධෝපායේ දක්ෂ වෘත්තීයමය කුලීහමුදාවන්ගේ සහය ලබාගැනීමට ඔවුන් තීරණය කළෝය. මේ ඉල්ලුමේ ප්‍රධාන සැපයුම්කරු වූයේ එවකට විරැකියාවෙන් පෙළෙමින් සිටි ස්විට්සර්ලන්තයයි. නමුත් විරැකියාවෙන් පෙලුනු නිකම්ම නිකම් රස්තියාදුකාරයන්ගේ ගොන්නට මේ ස්විස් කුලී හේවායන් එකතු කළ නොහැක. මන්දයත් ඔවුහු යුධෝපායේ කෙළ පැමිණියවුන් වූවා පමණක් නොව එකල කෙරුණු හෙල්ල, කෙටේරි යුද්ධයේත් උපන් හපනුන් වූහ. ඈත තියාම එල්ලවන ස්විස් හෙල්ල පහර ප්‍රතිවාදීන් මවිතයට පත් කලේය. ඇරත් ඉතා සුළු ගිවිසුමකින් ස්විස් හේවායන් කුලියට ගැනීමේ හැකියාවත් ස්විස් සෙබළුන්ගේ ජනප්‍රියත්වය තව තවත් නැංවීය.

හරීගේ හීනලන්තය : http://dreamsofharee.blogspot.com

ලන්ඩ්ස්කනෙෂ්ට්වරු

පෙර කී පරිදි ස්විස්වරුන්ගේ අතිශූර යුධෝපායන් තේරුම්ගෙන ඔවුන් මෙල්ල කළහැකි කිසිවෙක් පසළොස් වන ශතවර්ෂයේදී බිහි නොවීය. ඉතා විශාල කණ්ඩායම් වශයෙන් ඉතා දිගු හෙල්ල රැගෙන සටන්බිමට පිවිසීමත් යටත් වන්නන් සිරකරුවන් වශයෙන් භාරනොගෙන සියළුදෙනා මරාදැමීමත් දිගින් දිගටම ලබාගත් යුධ ජයග්‍රහණයත් නිසා ප්‍රතිවිරුද්ධ සේනාවෝ ස්විස් භටයන් කියූ සැණින් බයින් බීරාන්තව ගියහ. එමඟින් සතුරන් මානසිකව වැට්ටවීමේ වරමද ඔවුන් ලබාගෙන තිබිණි.

ස්විස් භටයන්ගේ සේවය තව තවත් ගුණාත්මක බවට පත්කළේ ඔවුන් තම වැටුප් ගෙවන්නා වෙත දක්වන පක්ෂපාතීත්වයයි.  සෙසු කුලී හමුදාවෝ යුද්ධය පැරදීගෙන එනවිට සටන තබා පලා ගියද වැඩි වැටුප් පිණිස ප්‍රතිවාදීන්ට එකතු වුවද ස්විස් භටයෝ එවැනි දේවලින් කීර්ති නාමය කෙළසා ගත්තහු නොවූවෝය. ඔවුහු එකා පිට එකා මැරෙනතුරුත් සටන අත් නොහැරියෝය. අවසානය දක්වා වැටුප් ගෙවන්නාට ලැදිව සේවය කළෝය. මේ නිසා ස්විස් කුලීහේවායන් ඉතා විශ්වාසදායක විය.

කුලීහේවායන් සතු කීර්තිනාමය හේතුකොටගෙන යුධ කටයුතු වලින් තොර පෞද්ගලික ශරීරාරක්ෂක වෘත්තියටද යුරෝපයේ ඉල්ලුමක් ඇතිවිය. රජවරු මෙන්ම විවිධ ප්‍රභූවරුද තම ශරීරාරක්ෂකයන් වශයෙන් ස්විස් සෙබළුන් භාවිතා කිරීමට පෙළඹුනු බව පෙනේ. ඒ ගැන තව මොහොතකින් සළකා බලමු.

හරීගේ හීනලන්තය : http://dreamsofharee.blogspot.com

පසළොස්වන ශතවර්ෂය අවසානය කරා පැමිණෙමින් තිබුණි. ස්විස් සේනාවෝ ධනයෙන් පිරී සිටියෝය. එහෙත් වැඩිකල් නටන්නට ලැබුණේ, ඔවුන්ට නොවේ. ස්විස් භටයින්ගේ යුධෝපක්‍රම තම තීක්ෂණ යුධ ඥානයෙන් විශ්ලේෂණය කොට ඊට ප්‍රතිවිරුද්ධ යුධෝපක්‍රම හඳුන්වා දුන් පිරිසක් එකණෙහිම යුරෝපයේ පහළවිණි. ඒ ලන්ඩ්ස්කනෙෂ්ට්වරුය (Landsknecht). ජර්මානු කුලී හමුදාවක් වූ ඔවුන් ස්විස්වරුන්ට දැනෙන තරමේ සටනක් දීමට තරම් දක්ෂයෝ වූහ.

හරීගේ හීනලන්තය : http://dreamsofharee.blogspot.com

එහෙත් තවමත් ස්විස්වරු දුර්වලයින් ලෙස හංවඩු ගැහී තිබුනේ නැත.  යුධෝපක්‍රම සතු වුවත් හෙල්ලෙයේ හා කෙටේරියේ පාලනය තවමත් පැවතියේ ස්විස්වරුන් අතය. යුද්ධයේ කරට කර සටනක් දීමට හැකිවුවත් ලන්ඩ්ස්කනෙෂ්ට් කුලීහේවායෝ ජනප්‍රිය වූයේද නැත. පෙර තරම් ජයග්‍රහණයන් නොවූවත් ස්විස්වරු තවමත් පෙරමුණේ සිටියහ.

ස්විස් කුලීහේවායන් ගෙදර යැවූ අත් තුවක්කුව

සියල්ල උඩුයටිකුරු කළ යුද්ධය Bicocca ( Battle of Bicocca) හි ආරම්භය සනිටුහන් වුණි. ඒ 1522 වර්ෂයයි. එක් පසෙක හෙල්ල හා කෙටේරි අතින්ගත් කුලීහේවා ස්විස්වරු වූහ. අනෙක්පස වූයේ ස්පාඤ්ඤවරුත් ඔවුන්ගේ කුලී හේවායන්වූ ලන්ඩ්ස්කනෙෂ්ට්වරුත්ය. යුද්ධය දරුණුවට ඇවිලී ගියේය. එහෙත් වෙනදා මෙන් ඈත සිට හෙල්ලයෙන් ඇන සතුරන් බිම දැමීමේ වරම ස්විස්වරු සතු නොවීය. ස්පාඤ්ඤයන්ගේ අත් තුවක්කු (Arquebus) වලින් නිකුත්වූ උණ්ඩ පියඹාවිත් ඔවුන්ගේ ජීවිත රැගෙන ගියේය. ස්විස්වරු යුද්ධයෙන් පරාජවූවා පමණක් නොව වසර සියයකට එහා සිට රඳවාගෙන සිටි 'රණශූර' නාමයද ඔවුන්ගෙන් ගිලිහිණි.

 --------------------------

හරීගේ හීනලන්තය : http://dreamsofharee.blogspot.com

 පෙර පැවසූ ලෙසම කුලී හමුදාවන්ගේ කීර්තිනාමය මත ඔවුන් පෞද්ගලික ආරක්ෂකයන් කරගැනීමට බොහෝ ප්‍රභුන් පෙළඹී සිටි බව පෙනේ. ප්‍රංශයේ කිරීටය දැරූ එකළොස්වන ලුවී රජු හා හා පුරා කියා තම ශරීරාරක්ෂව ස්විස් භටයින්ට භාරකළේය. ඔහුට අති විශාල ප්‍රමාණයේ ස්විස් සේනාංකයක සේවාව ලැබී ඇති අතර ක්‍රි.ව.1497 සිට ක්‍රි.ව. 1830 වනතුරුම ප්‍රංශ අධිකරණයේ ආරක්ෂාව භාරව තිබී ඇත්තේ ස්විස් භටයන් වෙතය.

ප්‍රංශයේ ඇතිවූ ස්විස් ශරීරාරක්ෂක රැල්ල එතනින් ඕලන්දයටත්, පෘතුගාලයටත්, වියානාවටත් පැතිර ගියේය. එතනිනුත් එය නතර නොවුණි. ඉතිහාසඥයන් පවසන පරිදි එකල යුරෝපයේ සෑම රටකම පාහේ ස්විස් ශරීරාරක්ෂක සෙබළු රාජකාරි කළෝය.

මේ සියළුම ස්විස් ශරීරාරක්ෂක සේවාවන්ටත් කුලී හමුදා සේවාවන්ටත් නැවතීමේ තිත තැබෙන්නේ 1874 සම්මතවූ ස්විට්සර්ලන්ත ව්‍යවස්ථා සංශෝධනයත් සමඟිනි.  එයින් නොනවතින ස්විට්සර්ලන්ත රජය 1927 පැනවූ තවත් නීතියක් මඟින් ස්විස් පුරවැසියන්ට වෙනත් රටක යුධ ක්‍රියාකාරකම්වලට සහභාගී වීම තහනම් කළෝය. නමුත් ඒ සියලු නීති පැනවූයේ විශේෂ ස්ථානයකට බලනොපාන පරිද්දෙනි. ඒ නීති මඟින් ස්විස් සෙබළුන්ට වතිකානු රාජ්‍යය තුළ සේවය කිරීමේ හැකියාව අහිමිවූයේ නැත.

හරීගේ හීනලන්තය : http://dreamsofharee.blogspot.com

පළමුව ස්විස් ශරීරාක්ෂකයන් වතිකානුවට වැද්දගන්නේ හතරවන සික්ස්ටස් පාප්තුමා ( Pope Sixtus IV) විසිනි. එයින් පසු අටවන ඉනසන්ට් පාප්තුමාත් (Innocent VIII) ස්විස් භටයින් පාවිච්චි කළේ මිලාන් නුවර වාසය කළ වංශාධිපතියෙකුගෙන් ආරක්ෂාවීම සඳහාය. මේ අවස්ථා දෙකේදීම ස්විස් භටයින් වතිකානුව තුළ සිටියද ඔවුන් ස්ථිර ආරක්ෂකයන් වූයේ නැත. තර්ජනයක් පැමිණි කෙණෙහි සේවය ලබාගත්තා සේම එය පහව ගියපසු මුදල් ගෙවා ඔවුන් පිටමන් කරන ලදී.

දෙවන ජූලියස් පාප්තුමා

ස්විස් භටයන් වතිකානුව තුළ පැළපදියම් වීමට අඩිතාලම වැටෙන්නෙ ප්‍රංශයේ රජකළ අටවන චාල්ස් රජතුමා ( Charles VIII of France ) නිසා. එක්දහස් හාරසිය ගණන්වල අගභාගයේදී  ප්‍රංශයේ අටවන චාල්ස් රජු ( Charles VIII of France ) නේපල්ස් නුවරට විරුද්ධව යුද්ධ ප්‍රකාශ කළේය. රජු යුද්ධය මෙහෙයවන අතර එවකට රජුගේ හිතවතෙක්වූ Giuliano della Rovere නම් කාදිනල්වරයාගේ සහයද රජුට ලැබුණි. යුධ වාතාවරණය නිසා කාදිනල්වරයාට යුද්ධ පිළිබඳවත් ඔවුන් යොදාගත් ස්විස් සෙබළුන් පිළිබඳවත් දැනුම ලැබී තිබිණි. යුධ ගණුදෙනු නිසාම ස්විට්සර්ලන්තය හා මිතුරුකම් ඇතිවී තිබිණි.

ක්‍රි.ව. 1503දි  දෙවන ජුලියස් (Pope Julius II ) නමින් පාප්ධූරයට පත්වෙන්නේ මේ කාදිනල්වරයාය. පාප්ධූරයට පත්වීමෙන් පසු ස්විස් සෙබළුන්ව තම ආරක්ෂාවට යොදාගැනීමට ගත් තීරණය ඉල්ලීමක් ලෙස ස්විට්සර්ලන්ත රජයට ඉදිරිපත් විය. පාප්තුමාගේත් ස්විට්සර්ලන්තයේත් එකඟතාවය මත වතිකානුවේ සේවයට එක්වූ සෙබළ පිරිස දෙසීයකි. ගිවිසුමෙන් පසු 1505 සැප්තැම්බර් මාසෙදි පිටත්වන මේ සේනාංකය රෝමයට පැමිණෙන්නෙ1506 ජනවාරි 22වැනිදා. ඒ හේතුකොටගෙන මෙදින පාප්තුමාගේ නිල ආරක්ෂක සේනාංකය පිහිටවූ දිනය ලෙස සැළකේ. පාප්තුමාගේ ආරක්ෂාවේ වගකීම භාරව සිටිය ද මොවුන් නිල වශයෙන් පාප්තුමාගේ ශරීරාරක්ෂකයින් හෝ වතිකානු රාජ්‍යයේ ආරක්ෂකයින් ලෙස නොසැළකේ. ඔවුහු සමස්ත රෝමානු කතෝලික සභාවේව නිල ආරක්ෂකයෝය. දෙවන පූලියස් පාප්තුමා විසින් "කතෝලික සභාවේ නිදහසේ ආරක්ෂාකරුවෝ" (Defenders of the Church's freedom) ගෞරවනාමය ද ඔවුන්ට පිරිනමා තිබේ.

හරීගේ හීනලන්තය : http://dreamsofharee.blogspot.com

සාමාන්‍යයෙන් ලොව ඕනෑම හමුදාවකට ඇතුළුවීමට මූලික සුදුසුකම් සැපිරීම අවශ්‍යවන්නාසේම ස්විස් සේනාංකයට ඇතුළුවීමටත් සැපිරියයුතු මූලික සුදුසුකම් ඇත්තේය. විසුළු ඇඳුමකින් සැරසී සිටියත් ඔවුන් එසේ මෙසේ පුද්ගලයන් නොවන බව පහත දැක්වෙන මූලික සුදුසුකම්වලින් වැටහේවි.

1. වයස අවුරුදු 19ත් 30ත් අතර උස අඩි 5යි අඟල් 8.5ට නොඅඩු අවිවාහක පිරිමි අයවලුන් විය යුතුය.
2. ආගම රෝමානු කතෝලික වියයුතු අතර ස්විට්සර්ලන්ත පුරවැසියන් වියයුතුය.
3. මූලික හමුදා පුහුණුව ලැබූබවටත් මනා චරිතයකින් හෙබි බවටත් ස්විට්සර්ලන්ත හමුදාව විසින් ලබාගත් සහතිකයක් ඉදිරිපත් කළ යුතුය.
4. වෘත්තීයමය මට්ටමේ පිළිගත් උපාධියක් හෝ යටත් පිරිසෙයින් උසස් ඩිප්ලෝමාවක් තිබීම අනිවාර්‍යය වේ.

සෑම වසරකම මැයි 6වෙනදා යනු ස්විස් භටයන්ට විශේෂ දිනයකි. එය ස්විස් වීරවරුන් සැමරීමේ දිනයයි.

දිවුරුම්දීම

Passetto di Borgo  මාර්ගය

1527 මැයි 6 වෙනිදා පස්වන චාර්ල්ස් රෝම අධිරාජ්‍යයාගේ සේනාව රෝමය ආක්‍රමණය කිරීමට වූහ. රෝමයට ඒ වනවිටත් ඇතුළුවී මහත් විනාශයක් කරමින් සිටි ඔවුන්ගේ ඉලක්කය වූයේ වතිකානුවයි. දහස් ගණනක සේනාවකට මුහුණදීමට වතිකානුව සතුවූයේ ස්විස් භටයින් 189දෙනා පමණි. එහෙත් සතුරාට එරෙහිව සටන්කර තම වගකීම ඉටුකළයුතුයැයි ඔවුන් සතු හැඟීම සියල්ලට ප්‍රබල විය. එකා පිට එකා මැරෙනතුරු ඔවුහු සටන් කළහ. දහස් ගණනක භට පිරිසක් හමුවේ 189කට කළහැකි කිසිවක් නොමැති බව අමුතුවෙන් කිවයුතු නොවේ. නමුත් පාප්තුමාව සතුරන්ගෙන් ගලවා Passetto di Borgo  රහස් මාර්ගය හරහා වතිකානුවෙන් පිටමං කිරීමට තරම් ඔවුහු ශූර වූහ. පාප්තුමා පිටවනතුරු වතිකානුව අල්ලා සිටීම වෙනුවෙන් සෙබළු147දෙනෙක්ම දිවි දුන්හ. ගැලවී ගියේ පාප්තුමා සමඟ ගිය සෙසු පිරිස පමණි.

රාජකාරීය දිවිහිමියෙන් සුරැකි රණකාමීන් වෙන්වූ දිනයකි, මැයි හය. එදින දිවි දුන් විරුවන් සැමරෙන අතරම සුදුසුකම් සැපිරූ නවක සෙබළුන් දිවුරුම් දී සේනාංකයට එක්වනු ලබයි. මෙලෙස එක්වන සෙබළෙකුට වර්තමානයේ මාසිකව යූරෝ 1300ක වැටුපකුත් ඊට අමතරව අතිකාල දීමනාත් නවාතැන් හා කෑම බීමත් ලැබේ. ඒ වෙනුවෙන් වසර 2ත් 25ත් අතර කාලයක් රෝමානු කතෝලික සභාවට සේවය කිරීමට ඔහු බැඳී සිටී.

උත්සව අවස්ථාවකදී නිල ඇඳුම

දැන් ස්විස් භටයෙකුගේ නිල ඇඳුම පිළිබඳ විමසා බලමු. ස්විස් භටයෙක් සතුව නිල ඇඳුම් දෙකකි. එකක් උත්සව අවස්ථාවන්හිදී අඳින නිල ඇඳුම වන අතර අනෙක දෛනික රාජකාරී නිල ඇඳුමයි.

උත්සව වෙනුවෙන් වෙන්වූ ඇඳුම රැළි සහිත උස් කොලරයකින් සමන්විත නිල්, රතු, තැඹිලි හා කහ වර්ණයන්ගෙන් වර්ණවත්වූ ඇඟලුමකි. ඊට අමතරව ඔවුන් රතු, සුදු, කහ, කළු, දම් වර්ණයන්ගෙන් යුතු පැස්බර පිහාටු සහිත මොරියන් හිස්වැසුම පළඳිනු ලැබේ. මේ පැස්බර පිහාටුවල වර්ණය උත්සවයේ ස්වභාවය අනුව වෙනස්වන අතර හිස්වැස්මේ වර්ණය තීරණය කරන්නේද උත්සවයේ ස්වභාවයයි.

සාමාන්‍ය හමුදා සොල්දාදුවන් පළඳින 'බෙරර්' වර්ගයේ කාලවර්ණ හිස්වැස්මට තද නීලවර්ණ ඇඟලුමක් යෙදීමෙන් සාමාන්‍ය දෛනික රාජකාරී නිල ඇඳුම නිර්මාණය වී තිබේ.

දෛනික නිල ඇඳුම

මීට අමතරව ආයුධ වශයෙන්  කඩුවත්, බැටන් පොල්ලත්, හෙල්ලයත්, කිරිච්චියත් සේම සිරුරේ ඉහළ කොටස ආවරණය වන සන්නාහයක්ද භාවිතයට ගැනේ.  නමුත් 1981දි ඇතිවූ දෙවන ජුවාම් පාවුළු පාප්තුමා ඝාතන උත්සාහයත් සමඟ ස්විස් භටයින් ආයුධ රහිත සටන් කලාවන් කෙරෙහි ද යොමුවූ අතර දැන් දැන් වර්තමානයට ගැළපෙන සුළු අවි පුහුණුවක්ද ඔවුන්ට ලැබේ. ඒ අනුව SIG P220 (P75), Glock 19 , Heckler & Koch MP5A3 , Heckler & Koch MP7, SIG SG 550 , SIG SG 552  වැනි අවි භාවිතයේ පලපුරුද්ද දැන් ඔවුන් සතුය. නමුත් නවීන අවි ප්‍රසිද්ධියේ දරා සිටීමක් තවමත් දකින්නට නැති සෙයකි.

හෙල්ලය

වසර පන්සිය ගණනක සිට රෝමානු කතෝලික සභාවේ නිල ආරක්ෂකයින් ලෙස කටයුතු කරන ඔවුන්ට විටින් විට වතිකානු රාජ්‍යයට අනුයුක්තව සේවය කළ විවිධ හමුදා සේනාංකයන් සමඟ කටයුතුකරන්ඩ සිදුවී ඇති අවස්ථා ඉතිහාසයෙන් සොයාගත හැක. 1860දි විසුරුවා හැරි Corsican Guard සේනාංකය සමඟත් 1870දි විසුරුවා හැරි  Papal Zouaves සේනාංකය සමඟත් 1970දි විසුරුවා හැරි Noble Guard  හා Palatine Guard  සේනාංක සමඟත් ඔවුන් බොහෝ සුහදව වැඩකළ බව පෙනේ. කිසිඳු ගැටුමක් වාර්තා නොවේ.

හරීගේ හීනලන්තය : http://dreamsofharee.blogspot.com

නමුත් 1506න් ඇරඹි වතිකානු ස්විස් භට ඉතිහාසයේ  එකම කළු පැල්ලම ඇතිවන්නෙ 1998 මැයි 4 වෙනිදාය. ඒ Cédric Tornay  නම් සෙබළා තම සගයෙකු වූ Alois Estermann නම්සෙබළාවත් ඔහුගේ බිරිඳවත් මරාදමා සියදිවි හානිකරගැනීමයි.                                                                                 

Papal Zouaves සේනාංකයේ භටයෙක්

Noble Guard  සේනාංකයේ භටයෙක්

Palatine Guard සේනාංකයේ භටයෙක්

2006 වසර එළඹියේ ස්විස් භට ඉතිහාසයේ නව පිටුවක් පෙරලමිනි. 1506දී වතිකානුවට පැමිණි ස්විස් භටයෝ ඒ වන විට වසර පන්සීයක් අඛණ්ඩව එකම හාම්පුතෙක් යටතේ සේවය කර තිබිණි. මෙම මොහොත ඔවුන් සැමරුවේද අමුතුම ක්‍රමයකටය. එදා 1506දි සේනාව පිටත්වූ තැන සිට ඒ මඟ ඔස්සේම ඔවුන් පාගමින් රෝමයට ආහ.

ස්විස්භටයින්ගේ සේවය තවමත් නිමාවී නැත. තව අවුරුදු ගණනාවක් යනතුරු සමහරවිට රෝමානු කතෝලික සභාව පවතිනතුරු ස්විස් භටයෝත් නිල ආරක්ෂකයින්ව හිඳිනු ඇත. එදාටත් අද මෙන්ම 'ලෝකයේ තවමත් පවතින ඉපැරණිම හමුදාව' යන නාමය ඔවුන් සතුවනු නොඅනුමානය.

"I swear I will faithfully, loyally and honourably serve the Supreme Pontiff [actual Pope] and his legitimate successors, and also dedicate myself to them with all my strength, sacrificing if necessary also my life to defend them. I assume this same commitment with regard to the Sacred College of Cardinals whenever the see is vacant. Furthermore I promise to the Commanding Captain and my other superiors, respect, fidelity and obedience. This I swear! May God and our Holy Patrons assist me!" හරීගේ හීනලන්තය : http://dreamsofharee.blogspot.com

 

(විනාඩි 1.30)

 (විනාඩි 2.12)

මූලාශ්‍ර:

• http://en.wikipedia.org/wiki/Papal_Zouaves
• http://en.wikipedia.org/wiki/Noble_Guard_%28Vatican%29
• http://en.wikipedia.org/wiki/Palatine_Guard
• http://en.wikipedia.org/wiki/Swiss_Guard
• http://en.wikipedia.org/wiki/Alois_Estermann
• http://en.wikipedia.org/wiki/Flamberge
• http://en.wikipedia.org/wiki/Comb_morion
• http://en.wikipedia.org/wiki/Landsknecht
• http://en.wikipedia.org/wiki/Arquebus
• http://en.wikipedia.org/wiki/Swiss_Mercenaries
• http://en.wikipedia.org/wiki/Charles_VIII_of_France
• http://en.wikipedia.org/wiki/Military_of_Vatican_City