ජේසුස් වහන්සේ (ජීවිත කතාව සරලව කෙටියෙන්) අද කියන්නෙ ප්‍රසිද්ධ ජීවිතය ගැන

කලින් කතාව අපි නැවැත්තුවෙ ජේසුස් වහන්සේ දේව මාළිගාවෙදි නැතිවෙලා ආයෙ හම්බුනාට පස්සෙනෙ. කලින් කතාවෙදි ප්‍රතිචාර දක්වපු බොහෝදෙනෙක් කිව්වා වගේ ජේසුස් වහන්සේගේ ජීවිත කතාවේ අවුරුදු 12ත් 30ත් අතර කාලය පිළිබඳව බයිබලයේ සඳහනක් නෑ. අද තමයි කතාවෙ දෙවෙනි කොටස. ඉතින් ඒක පටන් ගනිද්දිම ජේසුස් වහන්සේට වයස අවුරුදු 30ක් වෙන්නෙ ඒ නිසාමයි. ඔන්න මඟ හැරිච්ච කෙනෙකුට පුළුවන් පළමු කොටස කියවලාම ආරම්භයක් ගන්න. මතකනෙ කොටස් හතර

1. ජේසුස් වහන්සේගේ උපත (මෙතනින් කියවන්න.)

2. ජේසුස් වහන්සේගේ ප්‍රසිද්ධ ජීවිතය

3. ජේසුස් වහන්සේගේ දුක් විඳීම හා මරණය

4. ජේසුස් වහන්සේගේ මරණින් පසු ජීවිතය හා දෙවන පැමිණීම පිළිබඳ විශ්වාසයන්

එහෙනම් අද කතාවට යමුකො.

-------------------------------------

මේ වනවිට ජේසුස් වහන්සේගේ වයස අවුරුදු තිහක් පමණවී තිබිණ.  උන් වහන්සේවත් උන් වහන්සේගේ මෑණියන්වත් රක්ෂා කළ උන් වහන්සේගේ සුරැකි පියා 'ජෝශප්' මියගොස් තිබිණි.

ඒ දිනවලම  දැහැමි පුද්ගලයෙකු වූ ජොහාන් නැමැත්තෙක් ගලීලය පුරා දේශනා පවත්වමින් ගියේය. වනාන්තරයේ ඉතා අල්පේච්ඡ ජීවිතයක් ගෙවූ ඔහු ගැළවුම්කාරයාගේ පැමිණීම ඉතා ආසන්න බවත් ඒ නිසා තම පාප වලට පසුතැවිලි වන ලෙසත් දේශනා කළේය. ජනයාගේ වැරදි පමණක් නොව රජවරුන්ගේ වැරදි පවා ප්‍රසිද්ධියේ විවේචනය කරන්නට මැලිවූයේ ජොහාන් නොවේ. ඔහු මිනිසුන්ගේ වැරදි පෙන්වාදෙමින් ඒවා වෙනුවන් පසුතැවිලි වන ලෙස කීවේය. 

සමහර මිනිසුන් ඔහු පිස්සෙකු ලෙස සළකද්දී සමහරු ඔහුව විශ්වාස කළෝය. විශ්වාසයෙන් නොනැවතී ජොහාන්ගේ කීම අනුව තම පාපවලට මනස්ථාප ද වූවෝය. මෙසේ පාපයෙන් හැරී ඒමට කැමති මිනිසුන් තෝරාගත් ජොහාන් පාපයෙන් හැරී ඒමේ සංකේතයක් වශයෙන් ඔවුන් ජෝර්දාන් නදියේ ගිල්වා ස්නාපනය කළේය. මේ නිසා ඔහු ගලීලය පුරා ප්‍රකට වූයේ 'ස්නාවක ජොහාන්' නමිනි.

ශු. ත්‍රිත්වයම මෙලොව තුළ ප්‍රකාශ විය

ජොහාන්ගේ දේශනා අසා බොහෝ මිනිසුන් පසුතැවිලි වූහ. දිනක් ස්නාවක ජොහාන්ගේ දේශනා අසා පසුතැවිලි වී ස්නාපනය වීමට යන ජනතාව අතර ජේසුස් වහන්සේ ද සිටියේය.  නමුත් ජේසුස් වහන්සේ ළංවත්ම ස්නාවක ජොහාන්ට යමක් දැණිනි. මේ තැනැත්තා පව්කාරයෙකු නොවන බව වැටහිණි. "ඔබව බව්තීස්ම කිරීමට මම නොවටිමි" ස්නාවක ජොහාන් ජේසුස් වහන්සේව ස්නාපනය කිරීම ප්‍රතික්ෂේප කළේය.

"දැනට ඉඩ දෙන්න. දේව කැමැත්ත ඉටු කළ යුතුය" ජේසුස් වහන්සේගේ පිළිතුර විය.

ඒ අවසරයෙන් ජේසුස් වහන්සේ ස්නාවක ජොහාන් අතින් ස්නාපනය ලැබුවේය. උන් වහන්සේ දියෙන් ගොඩ එමින් සිටියේය. එකණෙහිම අහසින් හඬක් නික්මිණි. "මේ මාගේ ප්‍රියාදර පුත්‍රයාණෝය. මම ඔහු කෙරෙහි ඉතා ප්‍රසන්න වෙමි". ශුද්ධාත්මයාණෝ ද පරෙවියෙකු වේශයෙන් ජේසුස් වහන්සේ වෙත පැමිණුනේය. මෙසේ ශු. ත්‍රිත්වයම මෙලොව තුළ ප්‍රකාශ විය.

 -------------------------------------

ජේසුස් වහන්සේ ස්නාපනය ලැබූ ස්ථානය

'ස්නාවක ජොහාන්' (John the Baptist) එහෙම නැත්නම් 'ස්නාවක ජුවාම්' කියන්නෙ ජේසුස් වහන්සේට පෙර සිටි අවසාන දිවැසිවරයා විදිහටයි සළකන්නෙ. ජේසුස් වහන්සේගේ පැමිණීම වෙනුවෙන් ජනතාව සූදානම් කළ නිසා ඔහුට 'ජේසුස් වහන්සේගේ පෙරමඟ සලසන්නා' කියලත් කියනවා. එහෙත් ඔහු වුනත් ජේසුස් වහන්සේ ගැළවුම්කාරයා බව දැනගෙන නෙමෙයි ස්නාපනය කළේ. ඔහුට ජේසුස් වහන්සේව දැනුනේ මේ යම් ශුද්ධවන්ත පුද්ගලයෙකු ලෙස පමණලු. නමුත් මෙතනදි අහසින් හඬක් නික්මීමත් ශුද්ධාත්මයාණන්ගේ පැමිණීමත් (ඉස්සරහට තේරෙයි) නිසා බොහෝ දෙනෙක් ජේසුස් වහන්සේව වරප්‍රසාදලත් තැනැත්තෙක් ලෙස හඳුනාගන්න ඇති. 

ස්නාවක ජොහාන්ගේ හිස

 සමහරු කියන විදිහට ස්නාවක ජොහාන් ජොර්දාන් ගඟ බව්තීස්ම කිරීම සඳහා තෝරාගන්නේ කාන්තාර ප්‍රදේශයක් වෙච්හ ඊශ්‍රායෙලයේ තිබුණු හොඳම ජල මූලාශ්‍රය නිසාලු. ඒත් වසර ගානක් මිසරයේ වහල් කමින් මිදිලා ඇවිත් පොරොන්දුවූ දේශයේ නව ජීවිතයට ඇතුළුවුනේ මේ ගඟින් නිසා පාපයෙන් මිදී නව ජීවිතයකට ඇතුළු වූ බව පෙන්වන්න මේ ගඟ තෝරගත්තා කියලත් මත තිබෙනවා. කොහොම වුනත් ජොර්දාන් ගඟේ අදටත් බව්තීස්මයන් සිදුවනවා වගේම රෝමානු කතෝලික සභාවට ඇතුළුවීමටත් බව්තීස්මය අත්‍යාවශ්‍යයි. මේ ඒ ගැන ලියවුනු ලිපිය. ස්නාවක ජොහාන්ගෙ කතාවත් වෙනමම කියන්න වටින කතාවක්. අවසානයේදී ජොහාන්ට වෙන්නෙ හිස්ගැසුම් කන්න.

ජෝර්දාන් ගඟ

ජෝර්දාන් ගඟේ පිහිටීම ඔය සිතියමෙන් පේනවනෙ. ජොර්දාන් ගඟ කියන්නෙ බටහිර ආසියාව මැදින් ගලාගෙන ගිහින් මළ මුහුදට වැටෙන දිග ගඟක්. මළ මුහුදට වැටෙන එකම ගඟ. ඊශ්‍රායෙල්වරු මේ ගඟ ශුද්ධවූ දෙයක් හැටියට සළකනවා හරියට හින්දූන්ට 'ගංඟා' ගඟ වගේ. ගඟට කොච්චර ගෞරව කරනවාද කිව්වොත් ගං ඉවුරේ පිහිටි රටකුත් ජෝර්දාන් කියන නම් පාවිච්චි කරනවා. සිතියමෙන් ඔයාලට පුළුවන් ජෝර්දාන් ගඟ බලාගන්න. මතක ඇතුව මළ මුහුදත් ගලීල මුහුදත් බලාගන්න.

 මම දන්නවා දැන් ඔයාලාට තියෙන ප්‍රශ්න. ශු. ත්‍රිත්වය යනු කුමක්ද? ශුද්ධාත්මයාණෝ යනු කවුද? මොකක්ද අර අහසින් නික්මුණ හඬ. ඒ ගැන කියන්දෝ නොකියන්දෝ දෙගිඩියාවක ඉඳලා ඔන්න ඔහේ කියලාම දාන්ඩ හිතුවා. ඒක තේරුම්ගන්ඩ වගේම තේරුම් කරන්නත් අමාරුයි. අනික මෙතන කියන්ඩ ගියොත් ලිපිය කැලේ යනවා. ඒක නිසා කෙටියෙන් කියන්නම්. තේරෙන්නේ නැත්නම් පසුව ලිපියකින් පැහැදිලි කරනකම් මඟහැරලා යමු.

ශු. ත්‍රිත්වය

ඕගොල්ලෝ දන්නවා ඇතිනෙ ඒක දේවවාදී ආගම් වගේම බහු දේවවාදී ආගමුත් තියෙනවා.  කතෝලික ආගම කියන්නෙ ඒක දේවවාදී ආගමක්. ඒ කියන්නේ කතෝලිකයො විශ්වාස කරන්නේ එක දෙවි කෙනෙක්ව පමණයි. නමුත් කතෝලිකයන්ගේ විශ්වාසයේ හැටියට තැනැන් වහන්සේලා තුන්දෙනෙක් ඉන්නවා. නමුත් ඒ තුන්දෙනාම එකම දෙවිකෙනෙක්. 

දැන් කෙනෙකුට හිතෙන්න පුළුවන් තුන්දෙනාම එක්කෙනෙක් කියන්නෙ ඒ තුන්දෙනා විෂ්ණු දෙවියන්ගේ අවතාර දහය වගේ එකම දෙවියන්ගේ අවතාර තුනක් කියලා. නෑ.. අවතාර තුනක් නෙමෙයි. සම්පූර්ණයෙන්ම තුන්දෙනෙක්. හැබැයි එක්කෙනෙක්. ශු. ත්‍රිත්වය කියන පින්තූරය බැලුවොත් යම් වැටහීමක් එයි. තුන්දෙනාම එකම දෙවියෝ ඒත් තුන්දෙනා තුන්දෙනෙක්.

සරලව කියනවා නම් ඔහොමයි කියන්න වෙන්නේ. තේරෙන්නෙ නෑ නේද? හරි.. හරි.. අපි දැනට හිතමුකො තුන්දෙනා තුන්දෙනෙක් කියලා. 

ඕං  ආයෙම කතාවට එන්ඩ. මේ තුන්දෙනා තමයි පියාණන් වහන්සේ (දෙවියන් වහන්සේ), පුත්‍රයාණන් වහන්සේ (ජේසුස් වහන්සේ) හා ශුද්ධාත්මයාණන් වහන්සේ (Holy Spirit). ඉතින් ඔය තුන්දෙනාම ලෝකයේ ජනතාවට අත්දකින්ඩ ලැබුනු අවස්ථාවක් තමයි ජේසුස් වහන්සේගේ ප්‍රසාද ස්නාපනය. ඒකයි 'ශු. ත්‍රිත්වයම මෙලොව තුළ ප්‍රකාශ විය' කියන්නෙ. මෙහෙම වෙන්ඩ ඇත්තෙ ජේසුස් වහන්සේට සමාජයේ යම් පිළිගැනීමක් ලබාදෙන්ඩ කියලා තමයි කියවෙන්නෙ.

 -------------------------------------

ජේසුස් වහන්සේගේ ප්‍රසිද්ධ ජීවිතය ඇරඹීම සඳහා නිසිකල එළඹ තිබුණි. උන් වහන්සේ තමන්ට පැවරී තිබූ කාර්‍යය ඉටුකරනු පිණිස කුඩා කල පටන් හැදී වැඩුණු නාසරෙත්හි නිවසින් පිටව ගිය සේක.

ජේසුස් වහන්සේ පරීක්ෂා කිරීම

එයින් පසු පාළුකරයට ගමන් කළ උන් වහන්සේ දින හතළිහක් මුළුල්ලේ තම ප්‍රසිද්ධ ජීවිතය වෙනුවෙන් නිරාහාරව භාවනාවේ යෙදුනේය.  උන් වහන්සේ කුසගින්නේ සිටිනා කල්හි, එදා ඒවව පාපයට පොළඹවා (ආදම් හා ඒව) ලෝකයට පාපය ගෙනා පුද්ගලයා කරළියට ආවේය. ඔව්. සාතන්. භාවනා කරමින් සිටි ජේසුස් වහන්සේ ඉදිරියට ආ සාතන්, උන් වහන්සේගේ ශීලය බිඳින අදිටනින් ගලක් අතට ගත්තේය. එය ජේසුස් වහන්සේ දෙසට දිගු කළේය. "ඔබ දෙවියන් වහන්සේගේ පුත්‍රයා නම් මේ ගල් ගෙඩිය පාන් ගෙඩියක් වන්නට අණ කළ මැනව."

එයින් නොසැලුනු ජේසුස් වහන්සේ  "මිනිසා කෑමෙන් පමණක් ජීවත් නොවන්නේය යැයි ලියා ඇත" යි පිළිතුරු දුන්නේය. සාතන් පසු නොබැස්සේය. උන් වහන්සේට උස් තැනකට ආරාධනා කළේය. ලෝකයේ සියලු රට රාජ්‍යයන්ද ඒවායේ යස ඉසුරුද මවා පෙන්වීය. "ඔබ මට නමස්කාර කරන්නේ නම් මේ සියලු රට රාජ්‍යය වල ආධිපත්‍යයත් යස ඉසුරුත් ඔබට දෙන්නෙමි"

"නුඹේ දෙවි වන ස්වාමින් වහන්සේට පමණක් නමස්කාර කරන්න යැයි ලියා තිබේ"  ජේසුස් වහන්සේගේ පිළිතුර විය.

එයිනුත් නොසැලුනු සාතන් ජේසුස් වහන්සේව දේව මාළිගාවේ කොත මුදුනට රැගෙන ගියේය. "ඔබ දෙවියන් වහන්සේගේ පුත්‍රයා නම් මෙතනින් පහළට පනින්න. ඔබට රැකවරණය සැලසීමට දෙවියන් වහන්සේ සිය දූතයන්ට අණදෙනු ඇත කියා ද ඔබේ පය ගලක නොවදින පිණිස ඔසවනු ඇත කියාද ලියා තිබේ."

"නුඹේ දෙවි ස්වාමින් වහන්සේව පරීක්ෂා නොකරන්න කියා ද ලියා තිබේ"  ජේසුස් වහන්සේව තම ග්‍රහණයට ගත නොහැකිවූ සාතන් ඊට සුදුසු වේලාවක් එළඹෙනතෙක් උන් වහන්සේගෙන් ඉවත්ව ගියේය.

-------------------------------------

හොඳට බැලුවොත් ඉහළ තියෙන පින්තූරයෙන් ජේසුස් වහන්සේව පරීක්ෂා කළ අවස්ථා තුනම දකින්න පුළුවන්. දැක්කද?

ජෙරිකෝවේ Quarantania කඳු මුදුන

 ජෝර්දාන් ගඟේ ස්නාපනයෙන් පස්සෙ ජේසුස් වහන්සේ තම ප්‍රසිද්ධ ජීවිතයට සූදානම් වෙන්න ජෙරිකෝව අසල තිබිච්ච පාළුකරයට ගියාලු. දින 40ක් නිරාහාරව භාවනා කළා කියලාත් සඳහන් වෙනවා.

දැනට අනුමාන කරන පරිදි ජෙරිකෝවේ Quarantania කඳු මුදුනෙදි තමයි යක්ෂයා ජේසුස් වහන්සේව පරීක්ෂා කරන්න ඇවිත් තියෙන්නෙ. මේක සැබෑවටම සිදුවූවක් බව කියන පිරිසක් සිටිනවා වගේම මෙය යම් උපමාවක් විය හැකි බවට මත පළකරන පිරිසකුත් ඉන්නවා.

මේ ප්‍රදේශය ජනාවාස වලින් ඈත්වූ පාළු ප්‍රදේශයක්.  ඒකනෙ පාළුකරය කියන්නෙ. හෙබ්‍රෙව් ජනප්‍රවාද වල හැටියට Azazel නම් යක්ෂයෙක් මේ ප්‍රදේශයට අරක්ගෙන ඉන්නවාලු. ඒක නිසා මෙවැනි කතාවක් ඇතිවෙන්න ඇතැයි කියන පිරිසකුත් ඉන්නවා. එක් එක් මත කොහොම වෙතත් මේ කඳු මුදුන අදටත් හැඳින්වෙන්නෙ Mount of Temptation නමින්.

කිතුනුවන්ගේ විශ්වාසය අනුව නම් මෙතනදී යක්ෂයා හෙවත් සාතන් එන්නෙ ජේසුස් වහන්සේව පාපයට ඇද දමලා ඉදිරියේදී කරන්න යන මිනිසුන් යහපත් කිරීමේ වැඩපිළිවෙල කඩාකප්පල් කිරීමට. ගල් ගෙඩි පාන් කරන්ඩ කියලා ජේසුස් වහන්සේව 'කෑදරකම' (gluttony) නැමැති පාපයට ඇද දාන්න සාතන් උත්සාහ කරනවා. කඳු මුදුනට එක්කන් ගිහින් රට රාජ්ජ පෙන්වලා 'තන්හාව'(avarice)ට හසුකරගන්න උත්සාහ කරනවා. දේව මාළිගාවේ කොත මුදුනෙදි 'උඬඟුකම'(hubris)ට හසුකරගන්න උත්සාහ කරනවා. නමුත් සාතන්ට ජේසුස් වහන්සේව හසුකරගන්න ලැබෙන්නේ නෑ.

ඊළඟට මොනවාද මේ ලියා ඇත ලියා ඇත කියන්නෙ.  ජේසුස් වහන්සේ යක්ෂයාට පිළිතුරු දෙන්නෙ බයිබලයේ තියෙන පාඨ වලින්. ඒකයි ලියා ඇත කියන්නෙ. වර්තමානයේ කතෝලිකයන් භාවිතා කරන ශු. බයිබලයේ පරණ ගිවිසුම තමයි ජුදා ආගමිකයන්ගේ බයිබලය උනේ. ජුදා ආගමිකයෙකු වූ ජේසුස් වහන්සේ භාවිතා කළේත් මේ බයිබලය. ඉතින් ඒවායින් තමයි යක්ෂයාට උත්තර දෙන්නෙ.   ඒ පාඨ ගැනත් කියන්ඩ ගියොත් නම් ලිපිය කැලේ යයි. කොහොම හරි අන්තිමේදි පේනවා නේද සාතනුත් බයිබල් පාඨයකින්ම දෙන හැටි.

දින හතළිහක් නිරාහාරව හිටියා කියපු හින්දා හතළිහ ගැනත් කියන්නම්. බයිබලයේ ගොඩාක් තැන්වල මේ හතළිහ කියන ඉලක්කම තියෙනවා. මතකනෙ පොරොන්ඳු දේශයට යන්ඩ මෝසෙස්ට අවුරුදු 40ක් ගියා. තව තව ගොඩාක් තැන්වල හතළිහේ එව්වා තියෙනවා. ඉතින් මේ හතළිහ ගැන තියෙන මතයක් තමයි තරමක් විශාල සංඛ්‍යාවක් නිරූපණය කරන්ඩ හතළිහ යොදාගන්ඩ ඇතිබව. වඩාත් සරලව කිව්වොත් දින හතළිහක් කියන්නෙ හරියටම දින හතළිහක් නෙමෙයි යම් දිගු කාලයක් කියන එක. බයිබලයේ හරියටම දැක්වෙන්නෙ දහවල් හතළිහක් හා රාත්‍රී හතළිහක් නිරාහාරව හිටියා කියලායි. මොකද මේ දින හතලිහක් නොකියා එහෙම කියන්නෙ.  ඒක පැහැදිලි කරන්ඩ නම් ජුදෙව්වන්ගේ ඔරලෝසුව ගැන කියන්ඩ වෙනවා. මේ ඒකට වෙලාව නෙමෙයි. :)

 -------------------------------------

 පාළුකරයේ සූදානමෙන් පසු උන් වහන්සේ ගලීලයේ කපර්ණවුමට වැඩියේය.  එහිදී උන් වහන්සේගේ දේශනා ඇසූ ජනතාව උන් වහන්සේට ප්‍රශංසා කළෝය. ධර්මශාලාවල ඉගැන්වීමේ අවස්ථාවද උන් වහන්සේට ලැබිණි. ටික කලක් කපර්ණවුමේ ධර්මශාලාවල ඉගැන්වූ උන් වහන්සේ තම ගම වූ නාසරෙත් වෙත හැරී ආවේය.

ඒ වනවිටත් ජේසුස් වහන්සේ කපර්ණාවුමේ ධර්මශාලා වල ඉගැන්වූ බවත් එහිදී ජනතා ප්‍රසාදයට ලක්වූ බවත් අසා තිබූ පූජකවරු නාසරෙත්හි ධර්මශාලාවේ ඉගැන්වීමේ වරම උන් වහන්සේට දුන්නෝය. ජනතාව ද පොදි කකා ධර්මශාලා වලට රැස්විය. දිනක් නාසරෙත්හි ධර්මශාලාවේ උන් වහන්සේගේ දේශනා ඇසීමට ජනතාව රොක්වී සිටිද්දී  බයිබලය අතට ගත් උන් වහන්සේ එහි යෙසායාගේ පොත පෙරළා එහි පාඨයක් කියෙව්වේය.

"අද ඔබ සවන්දී සියදීම මේ දිවැස් වැකිය ඉෂ්ඨ වීය"

"ස්වාමින් වහන්සේගේ ආත්මය මා කෙරෙහි ඇත. මක්නිසාද දිළිඳුන් හට සුබ ආරංචිය දේශනා කරනු වස් උන් වහන්සේ මා ආලේප කළ සේක. වහලුන්ට මිදීමද අන්ධයන්ට පෙනීමද ලැබෙන බව දන්වන්ටත්, පීඩිත වූවන් මුදන්නටත්, ස්වාමින් වහන්සේගේ ප්‍රසාදයලත් වසර ප්‍රකාශ කරන්නටත් මා එවා වදාළ සේක."

එම පාඨය පහදන්නේ කෙසේදැයි සෙනඟ නෙත් අයා හිඳිද්දීම උන් වහන්සේ මෙසේ කී සේක.  "අද ඔබ සවන්දී සියදීම මේ දිවැස් වැකිය ඉෂ්ඨ වීය"

කන්දෙන් පහළට තල්ලු කරන පිණිස රැගෙන ගියෝය

මොහොතකට ජනතාව ගල් ගැසුණි. මෙය කෙලෙසකවත් ධර්මශාලාවක උගන්වන ගුරුවරයෙකුගෙන් පිටවිය හැකි වචනයක් නොවේ. ගුරුවරයෙකු කෙසේවෙතත් එලෙස අදිමදි කිරීමට තව තව හේතු නාසරෙත්හි ජනතාවට විය. එය පිළිගැනීමට මැලිවූ ජනතාව "මේ ජෝශප්ගේ පුතා නොවේද? " "මේ අර වඩුවගෙ පුතා නොවේද?" කුටු කුටු ගෑමෙන් එය පිළිබිඹු වේ. කුටු කුටු හඬ කණ වැටුණු ජේසුස් වහන්සේ "ගමේ දිවැසිවරයා ගමට අගේ නැත" යි ප්‍රකාශ කිරීමත් සමඟම කුටු කුටුව කෝලාහාලයක් බවට පත්විය. ජනතාව නැගීසිටියෝය. උන් වහන්සේව අල්ලාගෙන අසල පිහිටි කන්දෙන් පහළට තල්ලු කරන පිණිස රැගෙන ගියෝය. ඒත් උන් වහන්සේ ඔවුන්ගෙන් ගැලවී ඔවුන් මඟහැර ගියේය.

 -------------------------------------

කපර්ණවුමේදී ජේසුස් වහන්සේ ධර්ම ශාලාවල ඉගැන්වූවා වගේම සමහර රෝගීන්ද සුවකළා. ඒක නිසා ජුදා ආගමික ගුරුවරයෙක් වූ 'රබ්බි' වරයෙක් ලෙසයි ජේසුස් වහන්සේව මිනිස්සු පිළිගත්තෙ. ඒත් ඉතින් 'ගමේ අරක්කු නම්බු නෑ' වගේ නාසරතයේදී ජේසුස් වහන්සේව ගුරුවරයෙකු ලෙස පිළිගත්තත් ගැළවුම්කාරයා ලෙස පිළිගන්න නම් මිනිස්සු කැමති වෙන්නේ නෑ. අද උනත් ඉතින් ගමේ කවුරුහරි දියුණු වෙනකොට ඒකට මොනාහරි කියන්න මිනිස්සු කොච්චර ඉන්නවද?  'අපේ ගමේ වඩුවගෙ පුතා ගැළවුම්කාරයා??' එහෙම හිතන්ඩැති.

මෙතනදී ධර්මශාලා වල ඉගැන්වූවා කියන්නෙ ජුදා ආගමික මධ්‍යස්ථාන වලදී හෙවත් සිනගෝග (synagogue) වලදී මිනිසුන්ට ධර්මය කියාදීම. තමුන්ගේ ගමේ ධර්මශාලාවේ එහෙම උගන්වන්න ලැබුණු වෙලේක තමයි ජේසුස් වහන්සේ තමා ගැනම තිබුන අනාවැකියක් තෝරාගන්නෙ. ඒත් ඉතින් මිනිස්සු කැමති වෙන්නේ නෑ ජෝශප්ගේ පුතාව එහෙම නැත්නම් නාකි වඩ්ඩෙක්ගෙ පුතෙකුව තමුන්ගෙ ගැළවුම්කාරයා හැටියට පිළිගන්න. ඉතින් ධර්මයට අගෞරව කළා කියලා තමයි කන්දෙන් පහළට තල්ලු කරලා මරන්ඩ යන්නේ.

කෙටිම කෙටිම කෙටි කරත් ප්‍රසිද්ධ ජීවිතය ගැන කියන්ඩ එක ලිපියක් මදි වගේ. ඒක නිසා නැවත හමුවෙමු. ජේසුස් වහන්සේගේ කතාව ලියන්න ඉක්මන් උනා වැඩී කියලා හිතෙන්නෙ සමහර කරුණු වෙනමම පැහැදිලි කරන්න තරම් පුළුල් වීම. තේරුනේ නැති තැනක් තියනවා නම් පැහැදිලි කරන්ඩ බලන්නම්කො.

මූලාශ්‍ර :

 http://en.wikipedia.org/wiki/Temptation_of_Christ

 http://en.wikipedia.org/wiki/Azazel

 http://en.wikipedia.org/wiki/Mount_Quarantania