8.10.2012

උඹලාට හොඳක් කළාම එනවා කරේ නගින්න....පොරොන්දු වූ දේශය කරා.... (7 කොටස)

'පොරොන්දු වූ දේශය කරා....' සෑහෙන දිග කතාවක්. කොටස් වශයෙන් පළවේවි. බයිබලය ඇසුරින් කතාව ලියවුනත් බයිබලයේ තියෙන කතාව එහෙම පිටින් අරන් මෙතනට දාන්න නම් මගේ අදහසක් නෑ.  මේ කතාවෙදි මම කියන්න යන්නෙ ඉශ්‍රායෙල් ජාතියේ ඉතිහාස කතාවක්. පැහැදිලිව කියනවා නම් ඉශ්‍රායෙල් ජාතිය මිසරයේ වහල් බවට පත්වීමත් එයින් පසු ඉන්මිදී තමන්ගේම රටක පදිංචි වීමේ කතාවයි මේ. මෝසෙස් චිත්‍රපටිය නරඹපු කෙනෙක් නම් දන්නවා ඇති. නමුත් මගේ කතාව ඇරඹෙන්නේ මෝසෙස්ගෙන් නොවේ.

මෙතෙක් කතාව :- ආබ්‍රහම්ගේ පුතා වන ඊසාක්ට ඒසව් හා ජාකොබ් යනුවෙන් පුතුන් දෙදෙනෙකි. ජාකොබ්ට පුතුන් 12කි. ඔහුගේ පුතුන්ගෙන් කෙනෙකුවූ ජෝසෙප් අනික් පුතුන් විසින් වහලෙකු ලෙස මිසරයට විකුණනු ලැබේ. එහිදී ජෝසෙප් තම ස්වාමියාගේ හිත දිනා ගත්තද ස්වාමියාගේ බිරිඳ දූෂණය කිරීමට තැත් කිරීමේ චෝදනා ලැබ සිරගතවේ. නමුත් රටේ රජතුමාගේ හිත දිනාගන්නා ඔහු රටේ දේශාධිපති තනතුරට පත්වේ.

------------------------------------------------------------------------------------------------------------


ධාන්‍ය වික්කා
මතකනෙ සාගතය උග්‍රවුනාම ජෝසෙප් ගබඩාව ඇරලා බඩු විකුණන්න ගත්තා. ජෝසෙප් මෙහෙම බඩු විකුණුවෙ මිසර වැසියන්ට විතරක් නොවෙයි. උවමනාවටත් වඩා ධාන්‍ය තිබූ නිසා ඔහු අසල්වාසී රටවලින් පැමිණෙන ඕනෑම කෙනෙකුට ධාන්‍ය වික්කා. වැසියන්ගේ මුදල් නොමැතිවූවිට ඔවුන්ගේ සතුන් හිලව්වටද සතුන් අවසානවූ විට ඉඩම් හිලව්වටද ඉඩම් ඉවරවූ විට ඇග හිලව්වටද ඔහු ධාන්‍ය සැපයූවා.

මේ අතර කානාන් දේශයටත් දරුණුවටම සාගතය බලපානවා. "මොනාද දරුවනේ කරන්නෙ. අටුකොටු ඔක්කොම හිස්වෙලා. තව ටික කාලෙකින් කෑම නැතිව මැරෙන්නයි වෙන්නෙ." ජාකොබ් තම පුතුන්ගෙන් අහනවා.

"ආරංචියක් තියෙනවා තාත්තෙ මිසරයේ ඇතිවෙන්න කෑම තියෙනවාලු. නගරෙ කීපදෙනෙක්ම කෑම ගේන්න මිසරෙට ගිහින් කියන්නෙ"

මාස ගාණකට සෑහෙන්න අරන් වරෙල්ලා
"උඹලාට ඔච්චර දුර යන්න පුළුවන්ද?"

"කරන්න දෙයක් නෑ තාත්තෙ. දරුවන්ට කන්න දෙන්න යන්න වෙනවා. උන්ව බඩගින්නෙ මරන්න බෑනෙ"

"එහෙම නම් ගිහිල්ලා මාස ගාණකට සෑහෙන්න අරන් වරෙල්ලා" ජාකොබ් තම පුතුන්ට ගමනට අවසර දෙනවා. රූබන් ප්‍රමුඛ සහෝදරයො දහදෙනෙක් ගමනට ලෑස්ති වුනත් බාලයා වෙන බෙන්ජමින්ට අවසර ලැබෙන්නේ නෑ. තම ආදරණීය බිරිඳගෙන් ලත් පළමු දරුවා නැතිවීමෙන් පසු ජාකොබ් බෙන්ජමින්ව පණ මෙන් රකිනවා. කානාන් දේශයෙන් පිටත්වන ඉතිරි දසදෙනා කොටළු තවලමත් සමග දින කීපයකින් මිසරයට ලං වෙනවා.

ධාන්‍ය ගබඩාවට ඔවුන් ළඟාවෙද්දි ජෝසෙප් ඉන්නෙ ධාන්‍ය විකුණමින්. ජෝසෙප් තම සහෝදරයින්ව දුටු පමණින්ම අඳුනා ගන්නවා. නමුත් ඒ බව පෙන්වන්නේ නෑ. සහෝදරයෝද ජෝසප් දුටු පමණින්ම මුනින්තලාවී වැඳ වැටෙනවා. 'ජෝසෙප්ට මොනවා මතක් වෙන්න ඇත්ද? ' මේ ප්‍රශ්නය කියවන ඔයාලට.
නුඹලා ඔත්තුකාරයෝය

ඉතින් ජෝසෙප් සහෝදරයින්ව හඳුනාගත්තත් සහෝදරයන් ඔහු හඳුනන්නේ නෑ. අඩුම ගානෙ මේ මිසර වැසියෙක් නොවේ මේ හෙබ්‍රෙව් වැසියෙක් කියලාවත් හිතෙන්නේ නෑනෙ. මොකද ජෝසප් ඔවුන්ට කතා කරන්නෙ භාෂා පරිවර්තකයෙකු හරහා. "නුඹලා මොන රටකින්ද?" ජෝසෙප් මිසර භාෂාවෙන් එහෙම අහපුවම පරිවර්තකයා හෙබ්‍රෙව් වලින් ඒක කියලා "අපි කානාන් දේශයෙන්" කියපුවම ආයෙ මිසර භාෂාවෙන් ජෝසෙප්ට කිව්වා කියලා කියන්න ඕනෙ නෑ නේද? :)

"උඹලා රටේ දුබල තැන් බැලීමට පැමිණි ඔත්තුකාරයෝය" චෝදනාව බරපතලයි.

"නැත ස්වාමිනී, අපි ආහාර මිලට ගැනීමට පැමිණි අවංක මිනිස්සු. අපි එකම මිනිසෙකුගෙ දරුවො"

"නුඹලා ඔත්තුකාරයෝය"

"අනේ ස්වාමිනී, අපි ආවේ ධාන්‍ය මිලට ගන්න. අපි එකම මිනිහෙකුගෙ දරුවො. අපි 12ක් හිටියා. බාලයාව තාත්තා එව්වේ නෑ. අනිත්කෙනා ආගිය අතක් නෑ" 'මුං ගහන බොරු'. ජෝසෙප්ට එහෙම හිතෙන්න ඇති. ජෝසෙප් සෙබළුන් කැඳවනවා. "මොවුන් ඔත්තුකාරයෝද කියා හොයාගන්නකම් මොවුන්ව හිරේට දාන්න"

 සහෝදරයන්ට ජෝසෙප්ගේ නියමයෙන් දවස් තුනක් හිරේ ඉන්න වුණා. තුන්වෙනිදා ඔවූන්ව එළියට ගත් ජෝසප් මෙහෙම කියනවා. "උඹලා ඔත්තුකාරයෝද කියලා අපිට හරියටම හොයාගන්න බැරිවුනා. ඒක නිසා උඹලාට උඹලාගේ නිර්දෝශීභාවය ඔප්පු කරන්න වෙනවා. ගෙදර ගිහින් බාලයාව අරන් ආවොත් අපි පිළිගන්නම්. හැබැයි ඇපේට කෙනෙක් තියලා යන්න වෙනවා."

නොදන්නා රටකදි මේ වගේ අසරණවුනාම මොනවා කරන්නද කියන කියන දේට හා කියනවා මිසක්. වෙන කරන්න දෙයක් නැති තැන කට්ටිය එයට එකඟ වෙනවා. ජෝසෙප් ඔවුන් අතරින් සිමියොන්ව සිරභාරයට ගන්නවා. මේ වෙලාවෙ තමයි සහෝදරයින්ට තමුන්ගෙ කලින් කල අපරාධ සිහිවෙන්නෙ. "අපිට මේ පටිසන් දෙන්නෙ අපේ සහෝදරයාට කරපු පව්. ඔව්.. අච්චර හඬද්දීත් අපි හිතක් පපුවක් නැතුව ඔහුව වික්කා." ඔවුන් එකිනෙකා වැළපෙන්න ගන්නවා. 

 මේ සිද්ධිය පළමුවරට දැනගන්නා රූබන්ට තරහා යනවා. "මම කිව්වා නේද පොඩි එකාගෙ ඇඟට අතක් තියන්න එපා කියලා. උඹලා මහා නරුමයො. උඹලා මටත් හැංගුවා. දැන් ඉතින් කරන්ඩ දෙයක් නෑ. ඔහුගේ ලේවල ශාපය අපිට වැදිලා ඉවරයි. දැන් ඉතුරුවෙලා තියෙන්නෙ විඳවන්න විතරයි. " ඔවුන් හිතන්නේ නෑ හෙබ්‍රෙව් බසින් කෙරෙන මේ කතාබහ දේශාධිපතිට තේරෙනවා කියා. එකිනෙකාට චෝදනා කරගනිමින් කරන හැඬුම් දකින ජෝසෙප්ට තමුන්ගේ අතීතය සිහි වෙනවා. තමාව විකුණද්දී හඬාවැටුනු අයුරු මතක් වෙනවා. වෙළඳුන්ගෙන් ගුටිකමින් මිසරයට ආ හැටි වහලෙක් ලෙස වැඩකළ හැටි සිහිවීමෙන් ඔහු පිටට ගිහින් හඬා වැටෙනවා.

ගෝනි ලිහනකම් මේ බව දන්නේ නෑ
තුන් දවසක් හිරබත් කෑ සහෝදරයො සිමියොන්ට සමුදී කානාන්දේශයට පිටත්වීමටයි සූදානම. ඔවුන්ට ගෙන ආ මුදලට සරිලන සේ ධාන්‍ය ලැබෙනවා.  ජෝසෙප් සේවකයින් ලවා ඔවුන්ගේ මුදල් ඔවුන්ගේ ගෝනිවලටම දම්මනවා. සහෝදරයො ගෙදර ගොස් ගෝනි ලිහනකම් මේ බව දන්නේ නෑ. කාන්තාරය මැදින් කානාන් දේශයේ සිට පැමිණි ඔවුන් එකොළොස්දෙනා ආපහු යන්නෙ දහදෙනෙක්වෙලා. 

සිදුවූ සියල්ල විස්තර පියාට විස්තර කරන ඔවුන්ගේ අදහස හැකි ඉක්මණින් ගොස් සිමියොන් ගලවාගෙන පැමිණීම. ඔවුන් සියල්ල ජාකොබ්ට පවසා ආපසු යෑමට බෙන්ජමින්ව ඉල්ලනවා. "මාව මරාපල්ලා. බෙන්ජමින්ව දෙනවාට වඩා ඒකට මම කැමතියි. මුලින් ජෝසෙප් නැතිවුනා දැන් සිමියොනුත් නැතිවුනා. බෙන්ජමිනුත් නැතිවුනොත් මම එක මොහොතක්වත් ජීවත් වෙන්නෙ නෑ."

මෙයින් ආපසු යෑමේ අදහස අතහැරදැමෙනවා. සිමියොන් මිසරයේ හිරබත් කන අතර  දිනෙන් දින ධාන්‍ය ඉවරවෙනවා. මාස කීපයකට පසු. "දරුවනේ මිසරයට ගිහින් ධාන්‍ය ගෙනෙල්ලා" ඒ ආයාචනය ජාකොබ්ගෙන්.

"හරි .. බෙන්ජමින්වත් ලෑස්ති කරන්නකො"

"බෙන්ජමින්ව මොකටද?"

"බෙන්ජමින් නැතිව ගියොත් අර මිනිහා අපිව මරයි"

"උඹලා මොන කෙහෙල්මලකටද තව එකෙක් ඉන්නවා කිව්වෙ"

"අපි දන්නවායැ එක්කන් එන්න කියයි කියලා. අපි පවුලෙ විස්තර කිව්වෙ අපේ බේරීමට. ඔය විස්තර නොකිව්වනම් අපි මැරෙනකම්ම මිසරෙ හිරගෙදර. මිනිහා කියන්නෙ අපි ඔත්තුකාරයෝ කියලා.   බෙන්ජමින් නැත්නම් අපි යන්නේ නෑ. බඩගින්නෙ මැරිච්චාවෙ" දරුවො ටික තදින් ඉන්නවා. බෙන්ජමින්ව යවනවාද දරු මුණුබුරෝ සේරමත් එක්කම බඩගින්නෙ මැරෙනවාද යන දෙකින් එකක් ජාකොබ් තෝරාගත යුතුයි.

"එහෙම නම් බෙන්ජමින්ව අරන් යන්න. ඒ මිනිහාට තෑග්ගකුත් ගන්න. ගියපාර ලැබුණු මුදල් ආපහු දෙන්න. මගේ දරුවො මැරෙනවානම් මැරිච්චාවෙ" ජාකොබ් හිතහදාගන්නවා.

මේ විදිහට බෙන්ජමින්වත් රැගත් සොහොයුරන් මිසරයට ළඟාවෙනවා.  බෙන්ජමිනුත් සමග පැමිණ සිටි සොහොයුරන් දකින ජෝසෙප් ඔවුන්ව තමුන්ගේ නිවසට ගෙන යන ලෙස අණකරනවා. ජෝසෙප්ගේ නිවසට පැමිණිම මේ සොයුරන්ගේ බිය දෙගුණ තෙගුණ කිරීමට කාරණයක්. මොකද ඔවුන් හිතන් ඉන්නෙ කලින් වතාවේ ගෝනිවල මුදල් තිබීම නිසා ඔවුන්ව මෙසේ නිවසට කැඳවූ බවයි. ඒ නිසා වහාම ඉදිරිපත්වන එක් සොයුරෙක් මේ බව කියා මුදල් ආපසු දීමට සැරසුනත් ගබඩාවේ භාරකරුවා එය භාරගන්නේ නෑ. ඔහුගේ මුදල් ලැබුනු බවත් එය දෙවියන් වහන්සේ ඔවුන්ට දුන් තෑග්ගක් බවත් පවසනවා. 

ජෝසෙපුත් ආගිය කතා විමසලා කෑමට ඉඳගන්නවා
ජෝසෙප්ගේ අණ පරිදි නිවසේදී ඔවුන්ට සියලු පහසුකම් ලැබෙනවා.  නා කියා ගන්නා ඔවුන් තම කොටළුවන්ටද ආහාර දෙනවා. දවල් වෙනකොට ජෝසෙප් එන්නෙ දවල් කෑම කන්න බලාගෙන. සියලුදෙනා කෑමට වාඩිවූ පසු සොයුරෝ තමන්ගේ තෑග්ග පිරිනමා වැඳ වැටෙනවා. ජෝසෙපුත් ආගිය කතා විමසලා කෑමට ඉඳගන්නවා. ජෝසෙප් එක කෑම මේසයකත් සොයුරෝ එක කෑම මේසයකත් මිසර වැසියෝ තව කෑම මේසයකත් තමයි වාඩිවෙන්නෙ. මෙතනදි පේනවා මිසර වැසියන් හ්‍රෙබ්‍රෙව්වරුන් සමග කෑමට වාඩිවීම පිළිකුල් කළබව. ලංකාවෙත් ඉස්සර උසස් කුලයැයි සම්මත අය පහත් කුලේ අය සමඟ එක මේසයේ කෑම ප්‍රතික්ශේප කළාලුනෙ. මිසර වැසියනුත් හෙබ්‍රෙව්වරුනුත් අතර තිබූ මේ භේදය මිසර ජාතියත් හෙබ්‍රෙව් ජාතියත් මිශ්‍ර නොවී පැවතීමට හේතුවෙන්න ඇති. ඒ ටික ඉස්සරහට බලමු.

කාලා බීලා ඉවරවෙලා එකොළොස්දෙනා පිටත්වෙන්න සූදානම් වෙද්දි ජෝසෙප් තම සේවකයින්ට මෙහෙම කියනවා.  "මොවුන්ගේ ගෝනි ධාන්‍යවලින් පුරවලා සල්ලි ටිකත් ඒකටම දාන්න. මගේ රිදී කුසලානත් බාලයගෙ ගෝනියට දාන්න." මේ කිසිත් නොදන්න සොයුරෝ තමුන්ගෙ ගෝනිත් කොටළුවා පිට පටෝගෙන ආපහු කානාන් දේශයට යන්න පිටත්වෙනවා. තමුන්ගේ ගැටළු ඔක්කොම නිරාකරණය වෙලා සිමියොනුත් නිදහස් වෙලා බොහොම සන්තෝසෙන් මේ අය ඉන්නෙ.

ඔහොම ටික දුරක් ගියා කියමුකො.  දුර කතර ගෙවාගෙන කාන්තාරයේ මැදින් ගමන් කරන සොයුරන්ට  ඈතින් මතුවන අසරුවෙක් පේනවා. "අර කවුද දූවිලි අවුස්සගෙන හදිස්සියේ එන්නෙ"

"කවුරුහරි වැදගතෙක් බව නම් පේනවා. මිනිහා කොහෙද මේ හදිස්සියෙ යන්නෙ"

 ටික ටික අසරුවා හඳුනාගත හැකි මට්ටමට ළංවෙනවා. "මේ මිසරයෙ ගබඩාවෙ නිලධාරියෙක්නෙ"

"ඔහොම හිටපල්ලා හොරු ටික. උඹලාට හොඳක් කළාම එනවා කරේ නගින්න" අසරුවා ඈතදීම කෑසනවා. බයට පත්වන සොයුරෝ තමුන්ගෙ ගමන නවත්වලා යටහත් පහත් බැල්මෙන් නිලධාරියා දෙස බලනවා. අසු නවත්වන ඔහු මෙහෙම කෑ ගහනවා. "දුෂ්ඨ මිනිස්සු උඹලා අපේ ස්වාමියාගෙ රිදී කුසලාන හොරකම් කරා නේද?"

"අනේ සවාමිනී, වැරදිලා අපේ ගෝනිවලට වැටුනු සල්ලිත් ආපහු දුන්න අපි ඔය වගේ වැඩක් කරයිද?  හොඳයි ස්වාමිනී ඔබට පුළුවන් අපේ ගෝනි වල බලන්න. කාගෙහරි ගෝනියක එය තිබුනොත් ඔහුව ඔබේ වහලා කරගන්න"

මේ තියෙන්නෙ
"හොඳයි. බලමු." බිමට බසින නිලධාරියා ඔවුන්ගේ ගෝනි එකින් එක ලිහා බලනවා. මුල් සොයුරන් දහදෙනාගෙ ගෝනිවලින් කිසිවක් හමුවන්නේ නෑ. ඔවුන් සැනසුම් සුසුම් හෙළමින් සිටියත් අවසානයේ බෙන්ජමින්ගේ ගෝනියෙන් රිදී කුසලාන මතු වෙනවා. "මේ තියෙන්නෙ.. ජරා මිනිස්සු" සහෝදරයින්ට කට උත්තර නෑ. නිලධාරියා බෙන්ජමින්ව පමණක් ආපසු ගෙනයාමට උත්සාහ කළත් බෙන්ජමින් නොමැතිව ආපසු යා නොහැකි බව සිහිවන සොයුරෝ ඔවුන් පසුපස නැවතත් මිසරයට එනවා. 

ඔවුන් නැවත එද්දි ජෝසෙප් තම නිවසේ දොරටුව ළඟ.  "හොඳින් සළකපුවාම උඹලා දෙන තෑගි නේද ඔය. මේක මම දිවැස් කියන්ඩ පාවිච්චි කරන කුසලාන" නිලධාරියාගෙන් කුසලාන අතට ගෙන එය පරීක්ෂා කළ ජෝසෙප් තව සේවකයෙකුට එය භාරදෙනවා. "හ්ම්ම්.. මේක හොරකම්කරපු එකාව වහල් කමට ගන්ඩ අනික් උන්ට යන්ඩ කියන්න" ජෝසෙප් ගෙට යන්ඩ හැරෙනවා. ඒත් සොයුරෙන් පැමිණ ඔහුගේ කකුල් සිඹිමින් වැඳ වැටෙනවා. "අනේ ස්වාමිනී එහෙම කරන්ඩ එපා. අපිට මොහු අතඇරලා යන්ඩ බෑ. " 

"පලයල්ලා යන්ඩ" ජෝසෙප් කකුල ගසාදමා ගෙට එනවා. ඒත් පසුපසින් එන සොයුරෝ ඔහුගේ කකුල් අල්ලමින් වඳිනවා. 

"අනේ ස්වාමිනී අපිට මොහු දමා යන්න බෑ."
"අනේ ස්වාමිනී එහෙම කරන්න එපා. ගන්නවානම් අපි ඔක්කොම වහල් කමට ගන්න."

"එකෙක්ගෙ වරදට ඔක්කොටම දඬුවම් දෙන නරුමයෙක්ද මම"

"අනේ ස්වාමිනී අපිට මොහු දමා යන්න බෑ." ඔවුන් තවදුරටත් තමුන්ගෙ පවුලෙ විස්තරත් තමුන්ගෙ පියා ආදරය කළ දරුවන් දෙදෙනෙකු සිටි හැටිත් එයින් කෙනෙක් මියගිය හැටිත් ඒ වෙනුවෙන් පියා ජීවිතයම වැළපෙන හැටිත් ප්‍රකාශ කරනවා. ඒ අසන ජෝසෙප්ට තම හිත තවත් ගල්කරගෙන ඉන්න බෑ. ඔහු මහා හඬින් හඬා වැටෙනවා. කිසිවක් හිතාගත නොහැකිවන සොයුරෝ ගල්ගැසී බලාසිටිනවා. අන්තිමේ හිතට දිරිය ගන්නා ජෝසෙප්ගේ තොල් අතරින් මේ වචන පිටවෙනවා. "මම තමයි ජෝසෙප්. තාත්තා තාම ජීවතුන් අතරද?"

මේ වනතෙක් දේශාධිපති තැනට තිබූ බය දෙගුණ වෙනවා.  දැන් නම් අනිවාර්යෙන් ජෝසෙප් පලිය ගනීවි. ඔහුට කුඩාකල කල වෙනස්කම් වලට වෙළඳුන්ට විකිණීමට පලිය ගනීවි.  ඒත් ජෝසෙප් තමුන්ගේ සොයුරන්ට සමාව දෙනවා. "බය වෙන්න එපා මම මොකුත් කරන්නේ නෑ. මම එව්වා ඔක්කොම අමතක කළා. ඕගොල්ලො මාව එහෙම නොවික්කා නම් මම නිකම්ම නිකන් එඬේරෙක්. මම කවදාවත් මේ තත්වෙට පත්වෙයිද? මම ආවෙ නැත්නම් මිසරයට මෙහෙම සාගතෙන් බේරිලා ඉන්නවෙන්නෙත් නෑ. ඕගොල්ලන්ට මිසරයෙන් කෑම ගන්ඩ හම්බෙන්නෙත් නෑ. හැමෝටම බඩගින්නෙ මැරෙන්නයි වෙන්නෙ. මම නම් මේ දේවල් මේ විදිහට කරපු දෙවියන් වහන්සේට ස්තුති කියනවා. "
බය වෙන්න එපා මම මොකුත් කරන්නේ නෑ.

ජෝසෙප්ගේ වචන අසන සොයුරන්ගේ බිය දුරුවෙනවා. එමෙන්ම ජෝසෙප්ට ලැබී ඇති තනතුර ගැන ඔවුන් සතුටට පත්වෙනවා.  පාරාවෝත් තමුන්ගේ දේශාධිපතිගේ සොයුරන් පැමිණි බව දැන ඉතා සතුටු වෙනවා. "ඕගොල්ලන්ගේ පියාවත් දරු පවුලුත් මෙහෙ අරගෙන එන්න. බොරුවට මේ සාගතේ මැද්දෙ කානාන්වලට වෙලා දුක් විඳින්න ඕනෙ නෑ. මේ මිසර දේශයම සාගතයෙන් බේරාගත්තෙ ජෝසෙප්. ඒකට සැළකීමක් හැටියට මෙහෙ සරුම පළාත වෙච්ච 'ගෝෂෙන්' මම ඕගොල්ලන්ට දෙන්නම්"

ඊටපස්සෙ...


40 comments:

  1. මේක නිකන් නාට්ටියක් වගේ කතාව ගලාගෙන යනවා.
    මරු.. මගේ කොල හැලිච්ච රතුපාට බයිබල් පොත කියෙව්වා වගේ..
    ඒක නෙමේ හරි උබ ගාව නැද්ද එහෙම පොඩි බයිබලයක්. නැති වෙන්ඩ බෑ.. තියෙන්නම ඕනා..හික්ස් :)

    ReplyDelete
    Replies
    1. අදත් මම එක වෙලා. ඒක නෙමේ.. පොරොන්දු දේශයට තව ගොඩක් දුර ද ? අපි තාම මග ද ?
      ඉදිරි කතා වලදි මට ප්‍රශ්න වගයක් අහන්ඩ තියෙනවා. තාම ඒ හරියට ආවේ නෑ.. :)

      Delete
    2. රතුපාට පොත කිව්වෙ ළමා බයිබලයද? ඒකක් නම් තිබුනේ නෑ බන්.. මම පොඩි කාලෙ ඉඳන්ම කියෙව්වෙ ලොකු එක..

      මම ඒ කාලෙ පොඩි එකා වුනාට කළේ ලොකු වැඩ ඒක වෙන්න ඇති.. මධුවා දන්නවද මම පැන්සලෙන් ලියන්න ඉස්සෙල්ලයි පෑනෙන් ලිව්වෙ.. මට මොන්ටිසෝරියෙදි පැන්සල පුරුදු කරන්න සෑහෙන අමාරු වුනා.. ඒකාලෙ මට තෑගි හම්බුන පැන්සල් වගයක් මම ඒ කෙනාට ආපහුත් දුන්නා.. පෑනෙන් ලියන මට මොකටද පැන්සල් කියලා.. :)

      තාම කානාන් වලින් එළියට ආවෙත් නෑනෙ.. කානාන් වලින් එළියට ඇවිත් ආයෙ කානාන්වලට යන්නත් ඕනනෙ.. ඕක අවුරුදු 470ක විතර කතාවක්නෙ.. හදීස්සි වෙලා බෑ..

      Delete
  2. බලමු ඊලගට මොකද වෙන්නේ කියලා..

    ReplyDelete
  3. නියමයි.. ලිවිල්ල සුපිරියි..ඒක නිසා කියවන්ඩ ආසයි...

    මට මේ චිත්‍ර දැක්කම නම් මතක් වෙන්නෙ අරාබි කාරයන්ව.. උන්ගෙ ඇඳුනුත් මේ වගේ. ජුදා කියන්නෙත් මේ හෙබ්‍රෙව් අයටමද ?

    ReplyDelete
    Replies
    1. අගය කිරීමට ස්තුතියි සෙන්නා..

      http://dreamsofharee.blogspot.com/2012/08/3.html ඔය ලිපිය ටිකක් ආයෙ බලන්නකො සෙන්නා.. ඔය ලිපියෙදි මම කිව්වා වගේ ජාකොබ්ගෙ එක පුතෙක් තමයි ජුදා.. ජුදයින් පැවත් එන්නෙ ජුදාගෙන්.. ලිපිය බලන්න කිව්වෙ ඒකෙ තියෙනවා සිතියමක්..

      ආබ්‍රහම්ගෙන් පැවත එන කට්ටිය තමා හෙබ්‍රෙව්.. ඊටපස්සෙ ජාකොබ්ගෙන් එන පරපුර ඉශ්‍රායෙල්.. ඊශ්‍රායෙල් ජනතාවගේ ගෝත්‍ර දොළහ වෙන්නෙ ජාකොබ්ගේ පුතුන් 12න් පැවතෙන පරම්පරාවන්..

      Delete
  4. ඇඟ හිලව්වට ධාන්‍ය ගත්තු මිනිස්සු මිසරයේ වහල්ලු වෙනවද ?

    ෆාරාවෝ හොඳ මුනියා නේද :D

    ReplyDelete
    Replies
    1. ඔව්.. හැබැයි එහෙම වහල්ලු වෙන්නෙ මිසර ජනතාව.. නමුත් ඔවුනුත් දුඛිත ජීවිත ගතකරන වහල්ලු වෙන්නෙ නෑ.. ඔවුන්ට සාගතයෙන් පසු නිපදවන සෑම අස්වැන්නකින්ම පහෙන් එකක් බදු වශයෙන් ගෙවන්න නියම වෙනවා පමණයි..

      :)

      Delete
  5. ශෙහ්!!! මට දෙකක් මිස් වෙලා.. ඩෝන් ගාලා කියවගෙන එන්නං

    සුභ වේවා!!! රාජ සම්පත් ලැබේවා!!!

    ReplyDelete
    Replies
    1. එහෙනම් වෙඩි වගේ කියවලා එන්න..

      Delete
  6. නියමයි.. අද කලින් එකත් කියවලා නිකම් මදි මදි වගේ හිටියේ. දැන් හරි. මදි නොකියන්න කියෙව්වා. :)

    ReplyDelete
    Replies
    1. ක්සැන්ඩර් මදි මදි කියපු නිසාමයි පබ්ලිස් කරලා දැම්මෙ...

      Delete
    2. අන්න ඔව්වා පින් සිද්ද වෙන වැඩ.. :)

      Delete
  7. ජෝසප්ටත් හැඟීම් දැනීම් කියලා දෙයක් තියනවා එහෙනම්.. :)

    //කාන්තාරය මැදින් කානාන් දේශයේ සිට පැමිණි ඔවුන් එකොළොස්දෙනා ආපහු යන්නෙ දහදෙනෙක්වෙලා. //

    ආවේ 10 යි යන්නේ 9 යි නේද?

    ReplyDelete
    Replies
    1. ඕ.. ඒක වැරදීමක් සයුරි.. පොඩි ප්‍රින්ටින් මිස්ටේක් එකක්.. ඔයා හරි එන්නෙ 10යි යන්නෙ 9යි...

      Delete
  8. මටත් මධුරංගට වගේ රතු පාට ළමා බයිබලේ මතක් උනේ,මිසරයට ආවහම වෙන දේ බලමුකෝ එහෙනම්

    ReplyDelete
    Replies
    1. බලමුකො.. යථා කාලෙ වෙන දේවල්..

      Delete
  9. ඊට පෂ්ෂෙ මොකද වුනේ දන්නවද ඔයා...

    ReplyDelete
    Replies
    1. දන්නේ නෑ හලෝ...

      Delete
    2. ඊට පස්සෙ ජෝ..සප් ගැන කතන්දරේ
      කියනවා මන් අහන් ඉන්න දැන්..


      Delete
  10. අඩු ගානේ, මේ දැන් තියන කුණු දහ ජරා ටෙලි නාට්ටි හදන පඩත්තලයෝ, මෙහෙම එකක් වත් හදපියවුකෝ මෙගා නාට්‍යයක් හැටියට. හැබැයි එතකොට අපේම ඉන්න දෙපිටකාට්ටු කුහකයෝ කියයි, අන්න කතෝලික ආගම උස්සලා තියනවා, අපේ ආගම කොන් කරනවා කියලා. ඒ වගේ කුහකයෝ මේ කතා කියවන්නේවත් නැතුව ඇති.

    අසමි දකිමි සොයමි ලියන විචාරක

    ReplyDelete
    Replies
    1. නියම කථාව.

      Delete
    2. @ විචාරක Wඉචරක

      ඒක වෙනත් ආගමක් උස්සලා තිබීමක් කියලා හිතනවා නම් බලන්නකො ඔය ඕනෙ හැටියෙ කතා තියෙන්නෙ පන්සිය පනස් ජාතක පොතේ.. ජාතක කතාම 547ක් තියෙනවා..තව සද්ධර්මරත්නාවලිය වගේ පොත් වල කොච්චර නම් කතා තියෙනවද? කෝ මේ හරක් ඒ එකක්වත් ගන්නවද ටෙලි නාට්ටි හදන්න.. මට මතකයි කාලෙකට කලින් නම් සතියකට එකක් ද කොහෙද ජාතක කතා ආශ්‍රිත ටෙලියක් ගියා.. දැන් ඒකත් නැවතිලා..



      Delete
  11. නියමයි කතාව. චිත්‍රපටයක් වගේ ගලා යනවා. මේ කොටස කියවන කොට නම් දැනුනේ අවසාන කොටස ළගදෝ කියලා

    ReplyDelete
    Replies
    1. නෑ දයා අයියෙ.. තව අවුරුදු 470ක් විතර කතාවක් තියෙනවානෙ.. :)

      Delete
  12. හරීගේ මහන්සියට ගොඩක් ස්තුතියි..
    බලාගෙන යනකොට කතාව මුලදි ආව ප්‍රශ්නවලට දැන් දැන් උත්තර ලැබෙනවා..ඉතුරු ටිකත් ඉක්මනට ලියන්න...

    ReplyDelete
    Replies
    1. පොරොන්දු වූ දේශය කියන්නෙ මොකක්ද? කියන ප්‍රශ්නෙටත් ළඳීම උත්තරය ලැබේවි අක්කේ.. ඔන්න මම ඒ ටික ලිව්වා..

      Delete
  13. නියමයි..... කතෝලිකයෙක් වෙච්ච මමත් මේවා හරියටම දන්නේ දැන්නේ. ගොඩක් ස්තුති හරී.........

    ReplyDelete
    Replies
    1. අගය කිරීම ගැන ගොඩක් ස්තුතියි.. මාත් ලොකුවට ඔය කරුණු දන්නේ නෑ..

      Delete
  14. www,godnewsalert.org

    ReplyDelete
  15. මේක ලන්කවේ ඉදන් කරන කතොලික අඩවියක් ,කරන්නේ කුඩාගම පල්ලියේ කට්ටිය (මම හිතන විදියට)උදවක් කරන්න
    www.godnewsalert.org

    ReplyDelete
    Replies
    1. කියපු එක හොඳයි.. මම හිතුවෙ කලින් ලින්ක් එක ස්පෑම් එකක් කියලයි.. උදව්වක් කරන්න කියන එක නම් තේරුනේ නෑ..

      මේ විදිහෙ උදව්වක් කරන්නම්කො..

      මේ ලිපිය කියවන කතෝලික අය පහළ ලින්ක් එක තියෙන වෙබ් අඩවියටත් ගොඩවෙලා යන්න පුලුවන් නම් හොඳයී..

      www.godnewsalert.org

      Delete
    2. Hari" mama oya site eka karana kipa denek danawa oka karanne lanakawe prasida kithunu kala karuwo kipa denik, kuda gama palliye Fr,jeewantha eka..oya site eken free dawase dewa wachanaya (daily gospel) sms kara ganna puluwan methanin wadi visathara dana ganna(mata sinhalaen liyanna nohaki vima gana kamanna)
      http://www.godnewsalert.org/p/free-daily-gospel-sms.html

      Delete
    3. පහළ ලින්ක් එකට ගියානම් ඔයාට ලේසියෙන්ම සින්හල ටයිප් කරන්න පුලුවන්.. එතන ලියවෙන දේ මෙතනට කොපි කරාම හරි..

      http://www.ucsc.cmb.ac.lk/ltrl/services/feconverter/t1.html

      මම සයිට් එක බැලුවා.. විස්තරයට බොහොම ස්තුතියි!

      Delete
  16. හරිම කැමත්තෙන් මේ ලිපි ටික කියෙව්වා...
    O/L කරලා ගෙදර ඉන්න කාලෙ මමත් බයිබලය කියවන්න උත්සාහ කලා
    ඒ උනාට අර ජාතක කථා වගේම භාෂාව නිසා කියවන්න කම්මැලි හිතුණා. ඉතින් වැඞෙ අල්ලල දැම්මා. මේක නම් කියවන්න ආස හිතෙනවා.
    කොහොමත් යුදෙව්වන් ගැන හෙවීමේ උණකුත් තියෙන එකේ ( ඒ උණ හැදුනෙ ඉෂාක් බසේවිස් ව කියවීමෙන්, දෙවෙනි ලෝක යුද්ධය ගැන ලියවුනු දේ කියවීමෙන් සහ ඊශ්‍රායලය අද ඉන්න තැන ගැන හිතීමෙන්) මේ ලිපි ටික නියම බේතක්.

    ReplyDelete
    Replies
    1. බයිබලය ජාතක කථා භාෂාව තරම්ම අමාරු නෑ.. ඒත් එක එල්ලේම කතාව නොයා අතරමැද තියෙන නොයෙකුත් විස්තර නිසා කියවන්ඩ කම්මැලි හිතෙන එක සාධාරණයි.. ඉතින් මම කතාව තෝරලා බේරලා අරගෙන සරල භාෂාවෙන් ලියන්නෙ.. කියවන්න එන්න.. :)

      Delete
  17. හරී..., ඊළග කොටසත් ඉක්මනට ම දාපන් කෝ...

    ReplyDelete

පරණ ලිපි අලුත් ලිපි කියලා වෙනසක් නෑ. හිතෙන දේ කියලා යන්න. ස්තුතියි!

Related Posts Plugin for WordPress, Blogger...