පොරොන්දු වූ දේශය කරා.... (2 කොටස)

'පොරොන්දු වූ දේශය කරා....' සෑහෙන දිග කතාවක්.  කොටස් වශයෙන් පළවේවි. බයිබලය ඇසුරින් කතාව ලියවුනත් බයිබලයේ තියෙන කතාව එහෙම පිටින් අරන් මෙතනට දාන්න නම් මගේ අදහසක් නෑ.  මේ කතාවෙදි මම කියන්න යන්නෙ ඉශ්‍රායෙල් ජාතියේ ඉතිහාස කතාවක්. පැහැදිලිව කියනවා නම් ඉශ්‍රායෙල් ජාතිය මිසරයේ වහල් බවට පත්වීමත් එයින් පසු ඉන්මිදී තමන්ගේම රටක පදිංචි වීමේ කතාවයි මේ. මෝසෙස් චිත්‍රපටිය නරඹපු කෙනෙක් නම් දන්නවා ඇති. නමුත් මගේ කතාව ඇරඹෙන්නේ මෝසෙස්ගෙන් නොවේ.

මෙතෙක් කතාව :- ආබ්‍රහම්ගේ පුතා ඊසාක්ය. ඊසාක්ට ඒසව් ජාකොබ් නමින් පුතුන් දෙදෙනෙකු ලැබේ. බාලයා වන ජාකොබ් වැඩිමලාට උරුම පියාගේ ආශිර්වාදය ඔහු මුලා කිරීමෙන් ලබාගනී. මේ ගැන කිපෙන ඒසව් ඔහු මරන්න සොයනවිට සිය මාමාවූ හාරාන් වෙත පලායයි. 

 පොරොන්දු වූ දේශය කරා.... (1 කොටස)

-----------------------------------------------------------------------------------------------------------

ළිඳ වසා ඇති ගල ඉවත් කරන ජාකොබ්

ඉතින් මම කිව්වනෙ ජාකොබ් ළිඳ ළඟදි සුරූපි තරුණියක් දකිනවා කියලා. මේ තරුණිය වෙන කවුරුවත් නෙමෙයි ජාකොබ්ගෙ මාමාවූ ලාබන්ගෙ බාල දූ සිඟිත්ත.

"ඔය එන්නේ ලාබන්ගේ බාල දුව" ඈ ළිඳ ළඟට පැමිණි පසු ළිඳ වසා ඇති ගල ඉවත් කරන ජාකොබ් ඇගේ බැටළුවන්ට වතුර ලබාදෙනවා. ඔහු හඬමින් තමුන්ගෙ විස්තර ඈට කියනවා. ඇයත් ගොස් තමුන්ගෙ පියා වන ලාබන්ව කැඳවාගෙන එනවා. තමුන්ගේ ඥාතිපුත්‍රයා දැක ප්‍රීතියෙන් පිනායන ලාබන් තම නිවසට ඔහු කැඳවාගෙන යනවා.

පොඩි පහේ මෙව්වා එකක්

ඉතින් මේ බාල දුවගෙ නම තමයි රාකෙල්. වැඩිමල් දුව තමයි ලෙයා.  දෙන්නා අතරින් වඩා ලස්සන කෙනා තමයි රාකෙල්. ඉතින් ටික කාලෙකින්ම රාකෙලුත් අපේ ජාකොබුත් අතර පොඩි පහේ මෙව්වා එකක් ඇතිවෙනවා. ඔහොම කාලෙ ගෙවිලා පෙම මෝර මෝර ටික දවසක් යද්දි මාමා ජාකොබ්ට පොඩ්ඩකට කතා කරනවා. "පුතා මට පේනවා ඔයා ගෙදර වැඩ ගොඩක් මහන්සිවෙලා කරන බව. මම මාමා වුන පලියට මට නිකම් වැඩ කරන්න ඕනෙ නෑනෙ. ඔයාට මොනාද ඕනෙ කියන්නකො"

ඔන්න ජාකොබ්ට ආයෙත් වරමක් ලැබෙනවා තමුන් කැමතිදේ ඉල්ලගන්න. මතකනෙ එකපාරක් ඒසව් ඔහොම කියලා නා ගත්තා. "මම ඔබට අවුරුදු හතක් වැඩ කරන්නම්. ඒ වෙනුවට මට රාකෙල්ව දෙන්න." කාලගෝල කරපු දේමයි. ඉතින් තමුන්ගෙ ප්‍රේමවන්තිය වෙච්ච රාකෙල්ව දිනාගන්න වැඩකරපු අවුරුදු හත ජාකොබ්ට නම් බොහොම පොඩි කාලයක්ලු. කාලය ඉගිල්ලිලා අවුරුදු හතකුත් ගෙවුනා කියමුකො. ජාකොබ්ගෙ ප්‍රේමය මල්ඵල ගැන්වෙන්නයි යන්නෙ. 

තමුන්ගෙ දුවෙක් දීග දෙනවයි කියන එක තාත්තෙකුට ලොකු සතුටක්නෙ. ඉතින් ලාබන්ලගෙ ගෙදර ලොකු උත්සවයක් පැවැත්වෙනවා එදා රෑ. අමුත්තො ගොඩක් ඇවිල්ලා ජයටම සමරනවා. නැටුම් ගැයුම් වැයුම් එක්ක මධුපානෙත් එකතුවෙනවා.  කොහොම කොහොම හරි රෑවෙද්දි මංගල සභාවෙ කටයුතු අවසාන වෙනවා. උත්සවේ වැඩ ඉවරකරපු ජාකොබ් තමුන්ගෙ මනමාලිය හිටපු කුටියට යනවා.  

කොටු..කොටු..

කොටු කොටු නෙමෙයි උදේ නැගිටපු ජාකොබ්ට පේන්නෙ තරු.  කුටියේ සිටින්නෙ තම පෙම්වතිය වූ රාකෙල් නොවෙයි ඇගේ වැඩිමල් සහෝදරිය ලෙයා. මාමා නංගි පෙන්නලා අක්කව දීලා. මේ ක්‍රමය ලෝකෙට ආවෙ ඔතනින්ද මන්දා. ජාකොබ් වහාම තමුන්ගෙ මාමා සොයා යනවා. "මේ කරපු වැඩේ මොකක්ද? මම ඔබට සේවය කළේ රාකෙල් නිසා නෙමේද?" අහනවා හොඳ වැඩිද මන්දා.

මම ඔබට සේවය කළේ රාකෙල් නිසා නෙමේද?

"අක්කා ගෙදර ඉද්දි නංගිව දීග දෙන සිරිතක් අපේ නෑ. ඕනෑනම් රාකෙල්වත් දෙන්නම්. හැබැයි මට තව හත් අවුරුද්දක් වැඩ කරන්න පොරොන්දු වෙන්න." නංගී පෙන්නල අක්කා දුන්නා මදිවට තව කොන්දේසිත් දානවා. ජාකොබුත් ඒකට කැමතිවෙලා රාකෙල්ව ලබාගන්නවා. ඔහු රාකෙල්ට ආදරය කළත් ලෙයාව තඹේකටවත් ගණන් ගන්නේ නෑ. ජාකොබ් ලෙයාට වෙනස්කම් කරන්න පටන් ගන්නවා. ඉතින් ලෙයාට සිදුවන වෙනස්කම් අඩුවෙන්න දෙවියන් වහන්සේ ලෙයාට දරුසම්පත් දීලා රාකෙල්ට දුන්නේ නෑ කියලයි සඳහන් වෙන්නෙ.

තමුන්ට දරුවන් නැතිබව දැනගත් රාකෙල් තමුන්ගේ සේවිකාව 'බිල්හා' ජාකොබ්ට පාවාදෙන්නෙ ඇගෙන් දරුවන් ලබාගැනීමට. ඒක දකින ලෙයා තම සේවිකාව 'ශිල්පා'වත් ජාකොබ්ට පාවා දෙනවා.  මේ විදිහට ජාකොබ්ට බිරින්දෑවරු හතරක් ලැබෙනවා. ලෙයාගෙන් රූබන්, සිමියොන්, ලෙවී, ජුදා, ඉස්සාකර්, සාබුලොන් යන හයදෙනාත් බිල්හාගෙන් දාන්, නප්තලී යන දෙදෙනාද ශිල්පාගෙන් ගාද්, අෂෙර් යන දෙදෙනාද ලැබෙනවා. අන්තිමටම රාකෙලුත් ගැබ්ගෙන 'ජෝසප්' නම් පුතාව බිහිකරනවා. මේ නම් ඉස්සරහට වැදගත් වෙයි.

තමුන්ගෙ ආදරවන්තියගෙන් කුසෙන් දරුවෙක් ලැබුනාම තමයි ජාකොබ් තම ජීවිතයේ සම්පූර්ණත්වය දකින්නෙ.  ඒ නිසා ඔහු ජෝසප්ට අන් සියල්ලන්ටම වඩා ආදරය කරනවා. දැන් ජාකොබ්ගෙ අදහස තමුන්ගේ දේ දේපළ හා පරපුර රැගෙන ආපසු ගෙදරට යන්න. 

මේ වෙනකොට ලාබන් ලොකු පෝසතෙක්වෙලා තිබුනෙ.  ජාකොබ්ගෙ උත්සහය නිසා ඔහුට විශාල වශයෙන් ධනය ලැබී තිබුණා. මේ නිසා ජාකොබ්ව හරවා යැවීමට ඔහු කැමතිවෙන්නේ නෑ. මේ නිසා ජාකොබ් වෙනත් ඉල්ලීමක් කරනවා. ඒ ඔහුගේ පවුල වෙනුවෙන් දේපළින් කොටසක් දෙනවානම් දිගටම තමන් මාමා සමඟ රැඳී සිටින්නට පොරොන්දු වෙන බව. "ඔබට මොනාද ඕනෑ?" එකම ප්‍රශ්නය නැවතත් ජාකොබ්ට. 

ගස්වගේක පොතු ඇරපු කෝටු සත්තු බොන වතුර වලට දානවා

"මම අද හවසට එන්නම් බැටළු පට්ටි ගව පට්ටි පැත්තෙ. ඔබගේ රැළේ සිටින කළු බැටළුවොයි පුල්ලි තියෙන එළුවොයි මට දෙන්න. උන් මගේ සතුන් වශයෙන් හැදුනාවෙ" මේකට ලාබන් කැමති වුනත් ඔහු වහාම රැළේ හිටපු කළු බැටළුවොයි පුල්ලි එළුවොයි තමුන්ගෙ පුතුන් ලව්වා පිටමන් කරවනවා. මෙච්චර වස්තුව හොයලා දීපු මනුස්සයට කරන බලුවැඩ. ඊටත් ජාකොබ් කියන්නෙ පිට මිනිහෙක්ද තමුන්ගෙම බෑනනෙ. ජාකොබ් සැලෙන්නෙ නෑ. ඔහු ගස්වගේක පොතු ඇරපු කෝටු සත්තු බොන වතුර වලට දානවා. මම හිතන්නෙ බේතක් වෙන්නැති. ඉතින් මේ බේත බොන සත්තු දාන්නෙම කළු බැටළුවොයි පුල්ලි එළුවොයි. ඉතින් උන් එකතුවෙන්නෙ ජාකොබ්ගෙ පට්ටියට. මේ විදිහට ශක්තිමත් සත්තුන්ට බේත් දාපු වතුරත් දුර්වල උන්ට නිකන් වතුරත් දීම හින්දා ජාකොබ්ගේ රැළේ සත්තු ශක්තිමත් වෙද්දි ලාබන්ට ඉතුරු වෙන්නෙ දුර්වලයො. 

සිදුවේගනෙ යන මේ ක්‍රීයාව නිසා ලාබන්ගෙ පුත්තුන්ට ජාකොබ් ගැන වෛරයක් ඇතිවෙනවා. ඒවගේම ලාබන්ගේ හොඳ හිතත් නැතිව යනවා.  තමුන්ට දිනෙන් දින සිදුවන වෙනස් කම් ඉවසා ගන්න නොහැකිවන ජාකොබ් තමුන්ගෙ සියලු වස්තුවත් පරපුරත් රැගෙන මාමා වෙතින් පලා එනවා.

එහෙම ආවත් ගෙදරට යන්න බෑනෙ. මේ එන ජාකොබ්ට මතක් වෙනවා තමුන්ට ගෙදර සිටිනා ලොකුම බාධාව ඒසව් බව. ඔහු සමාදානය පිණිස දූතයන් යවනවා. ඒ දූතයන් පවසන පරිදි ජාකොබ් ගැන අසා තම සහෝදරයා හාරසියක් පිරිස සමග පැමිණෙන බව ඇසීමෙන් ජාකොබ් බියවී පිරිස කණ්ඩායම් දෙකකට බෙදනවා. මොකද හදිසියේවත් ඒසව් පහර දුන්නොත් එක කණ්ඩායමක්වත් ගැලවෙයිනෙ කියලා හිතලා. ඒසව්ව සැනසීමට තෑග්ගක් දීමට කල්පනා කරන ජාකොබ් තමුන්ගෙ රංචුවෙන් හොඳම සතුන් වගයක් තමුන්ගෙ සේවකයො අතේ පෙර මඟට යවනවා. ආරක්ෂාව පතා සියලුදෙනාවම ගඟෙන් එගොඩ කරවා රාත්‍රී කාලයේ කූඩාරමේ තනිවමයි ඔහු සිටින්නෙ.

ජාකොබ් එක්ක පොරබදන්න පටන් ගන්නවා.

තවත් අද්භූත සිද්ධියක් සිදුවෙනවා. මෙතනදී හදිසියේ කඩාවදින යමෙක් ජාකොබ් එක්ක පොරබදන්න පටන් ගන්නවා.  එළිවනතුරුත් පොරය නිමවෙන්නේ නැතිබව දකින ඔහු ජාකොබ්ගේ කලවයට පාරක් ගහනවා. එම පහරෙන් කලවය විසන්ධි උනත් ජාකොබ් පොරය අතහරින්නේ නෑ. "දැන් එළිය වැටීගෙනත් එනවා. මට යන්න දෙන්න" අනිත් පුද්ගලයා ඉල්ලා සිටිනවා.

"මට ආශිර්වාද කරන්න"

"ඔබේ නම කුමක්ද?"

"මම ජාකොබ්"

"ඔබ ජාකොබ් නෙමෙයි. දෙවියන් හා පොරබැද ජයගත් නිසා ඔබේ නාමය මින්පසු ඉශ්‍රායෙල් වේවි."

"ඔබේ නම කුමක්ද?" එහෙත් පුද්ගලයා නොපෙනී යනවා. මේ සිද්ධියෙන් පසුව තමයි ජාකොබ්ට ඉශ්‍රායෙල් නම භාවිතා වෙන්නෙ. ඒ වගේම ඔහුගෙන් පැවතෙන්නන් ඉශ්‍රායෙල්වරුන් වෙන්නෙ. සිතුවම්වල දැක්වෙන පරිදි මේ තැනත්තා දේව දූතයෙක්. රෑ තිස්සෙ පොර බදලා කකුලත් කඩාගෙන කොර ගගහා කූඩාරමට පැමිණෙන ඔහුට තවත් බියගෙන දෙන දර්ශනයක් ඇස ගැටෙනවා.

 ඊටපස්සෙ මොකද වුනේ?

 

පෙර කොටස

ඊළඟ කොටස