10.26.2015

පාවෙන පොත් නැව

මට මීට ටික කාලෙකට කලින් බුකියේ 'පොත් කියවන අය'ගෙන් හොඳ ඔත්තුවක් ලැබුණා. පොත් ප්‍රදර්ශනාගාරයක් සමඟ ලොව වටා සැරිසරන 'ලෝගෝස් හෝප්' කියන නැව ඔක්තෝම්බර් මාසෙ 22 වෙනිදා කොළඹ වරායට එනවා කියන එකයි ඒ ආරංචිය.

පොත් නැවක් ඇවිත් ගියා කියන ප්‍රවෘත්තිය කීපපාරක්ම අහලා තිබුනත් කවදාවත් යන්න ලැබුනේ නෑ. මොකද රූපවාහිනී ප්‍රවෘත්ති වලට උනත් කියන්නෙ 'ප්‍රදර්ශනය හෙටින් අවසන් වේ' කියලනෙ. එක්කෝ ආරංචිය ලැබෙනකොට නැව මූද මැද්දෙ. ඉතින් මේ පාර ආරංචිය දැනගත්තු ගමන්ම ඒ කට්ටියගෙන්ම වැඩි විස්තර අහගත්තා. නැවට යන්නේ කොහොමද? පොත් ලාභද? මොන මොන වේලාවල්වලද ප්‍රදර්ශනය විවෘතව තියෙන්නෙ? ආදී දේවල්. මේ ඔක්කොම විස්තර දැනගත්තට පස්සෙ අපි දෙන්නත් අම්මලාවත් ගමනට එකතු කරගත්තා.

චෛත්‍යය මාවත
පහළින් මම පොඩි සිතියම් කෑල්ලක් දැම්මා නොදන්න කෙනෙකුට දැනගන්න පහසුවෙන්න. නැව බලන්න යනවානම් වරායට ඇතුළුවෙන්න ඕනෙ චෛත්‍යය මාවත පැත්තෙන්. එතන තියෙන ටිකට් කවුන්ටරයෙන් ටිකට් එකක් ගන්න ඕනෙ රුපියල් 100කට. තමුන් පෞද්ගලික වාහනේක යනවානම් ඒ අහළ පහළ වාහනේ ගාල් කරලා නොමිලේ සේවය සපයන බස් රථයකට ගොඩවෙන්න ඕනෙ. මම මෙතනදි දැක්ක දෙයක් තමයි බස් රථයේ සීට් ගානට සෙනඟ පිරෙන්නෙ ඔන්න මෙන්න තියෙද්දි පිටත්වෙලා යන එක. කලින් මේ වගේ ප්‍රදර්ශනවලට යන බස්වල නගින්න ගිහින් පොරකාලා එල්ලිලා යන්න වෙච්ච අත්දැකීම් තිබ්බ මට ඒක නම් ලොකු දෙයක් කියලා හිතුනා. අනිත් එක තමයි වයස 65ට වැඩි අයට මුදල් අය කරන්නෙ නෑ.

බස් එක අපිවත් අරගෙන වරාය තුළට ඇතුළු උනා. ටික වෙලාවකින් මෙන්න තියෙනවා නැව, 'ලෝගෝස් හෝප්'. බස් එකෙන් බැහැලා හිමීට හිමීට පඩිපෙළ දිගේ ජීවිතේ පළවෙනි වරට නැවකට නැග්ගා. නැවට නැග්ගට පස්සෙ පැද්දි පැද්දි යන්න වෙයි කියලා හිතුවට මේ ඉන්නෙ නැවකද කියලා හිතාගන්න බැරිතරමට ස්ථාවරයි. :) මදෑ හෙල්ලි හෙල්ලි පොත්ගන්න ආවා. 

නැවේ තිබුනේ පොත් හා සිහිවටන තමයි ගොඩක් දුරට. මිල නියම කරලා තිබුනේ වෙනම ඒකක වලින් ඒ එක් ඒකකකයක් ලංකාවේ මුදල් වලට හරවන්න 3න් වැඩි කරන්න ඕනෙ. 

නැවේ තිබුනු බහුතරයක් පොත් ඉංග්‍රීසියෙන් ලියවෙච්චි එව්වා. අතරින් පතර සිංහල පොත් කිහිපයක් තිබුනත් ඒ සියල්ලම පාහේ ක්‍රිස්තියානි ආගමික ග්‍රන්ථ. මෙතන පොත් අතර තිබුනු විශේෂත්වය තමයි ප්‍රබන්ධ කතා වලට වඩා වෙනත් පොත් බහුලව දකින්නට ලැබීම. පුංචි ළමයින්ගේ පොත් එකතුවේ ඇරෙන්න අනික් තැන්වල ප්‍රබන්ධ ලෙස සැළකිය හැකි කතා තිබුනෙ ඉතා ස්වල්පයයි.
පොත්

බහුලවම තිබුනෙ වෙනත් පොත්. ඒ කිව්වෙ උද්‍යාන අලංකරණය , විලාසිතා , සෞඛ්‍යය , ක්‍රීඩා, විනෝදාංශ, ආගමික, සුපශාස්ත්‍ර, කළමනාකරණය ආදී ක්ෂේත්‍ර ගණනාවක වෛවර්ණයෙන් මුද්‍රණය වෙච්ච පොත් ගණනාවක්ම තිබුනා. මට හිතුණු හැටියට නම් ඒ පොත්වල මිල ලංකාවේදී ඒ පොත් මිලදී ගැනීමට යන මුදලට වඩා අඩුයි. ඒත් සාමාන්‍යයෙන් එවැනි විෂයන් සම්බන්ධ පොත්පත් ලාංකිකයන් පරිහරණය කරනවා අඩුයි කියලයි මට හිතෙන්නෙ. සරලවම කිව්වොත් නිකම් කියවලා රසවිඳිනවාට වඩා ඒ පොත උපකාරී කරගෙන යම් ක්‍රියාවක් කරන්න ඕනෙ පොත් පත් තමයි බහුලවම තිබුනෙ. 

පොත් හැරුනාම එතන තිබුනු සිහිවටන වල මිල ගණන් නම් වැඩී කියලයි මට හිතෙන්නෙ. සාමාන්‍ය පින්තූර පෝස්ට්කාර්ඩ් එකකුත් රුපියල් 75ක් විතර උනා. 

මමත් පොත්පත් කිහිපයක්ම මිලට ගත්තා. විශේෂයෙන් මිලදී ගත් විශ්වකෝෂය රුපියල් 1500කට වඩා වැඩි දැනුමක් ලබාදෙනු නොඅනුමානයි.

පොත්පත් මිලදී ගැනීමේ කුටියෙන් පස්සෙ තිබුනෙ පින්තූර කතාවක් සහිත කුටියකට. එතන මුළු කතාවම අහන්න නොහිටියත් පින්තූර වලින් තේරුනේ වර්තමාන අකීකරු පුත්‍රයෙකුගේ කතාවක් වගේ. ඊළඟට තිබුනේ ආපනශාලාව. එතනදී අපි අසලට ආපු නැවේ කාර්‍යය මණ්ඩලයේ පුද්ගලයෙක් බොහොම සුහදව විස්තර ඇහුවා. ඔහු කියූ පරිදි නැවත නැව මෙහි පැමිණීමට තව අවුරුදු හයක් හෝ හතක් ගතවේවි.

ඔක්කොම ඉවරවෙලා නැවෙන් එළියට එද්දිම තිබ්බ ධාරානිපාත වර්ෂාව හින්දා වරාය අවට වැඩියමක් බලාගැනීමට ලැබුනේ නෑ. 

තව කල් තියෙන නිසා කැමති අයට පුළුවන් නැව බලන්න යන්න. එහෙම බැරි අය මෙතනින් නැව ඇතුලේ සවාරියක් ගිහින් එන්න.

10.22.2015

තෝබිත්ගේ කතාව 6 - අවසානය

කට්ටියට මතකයිද තෝබිත්ගෙ කතාව? යන්තමට හරි මතකයක් තියෙනවද එහෙම කතාවක් මම කියන්න පටන් ගත්තා කියලවත්? ඒ කතාව ඉවර නෑ කියලා මට අමතක වෙලා තිබ්බ එකේ කියවපු ඔයාලට මතක තියෙන්න නම් අමාරුයි. මතක උනත් අමතක වෙලා තිබ්බත් අද කියන්න යන්නෙ තෝබිත්ගෙ කතාවෙ අන්තිම කොටහ. අමතක කෙනෙක්ට මෙතෙක් කතාව කියවලා බලන්න පුළුවන් පහල
ලින්ක් වලට ගිහිල්ලා බැලුවොත්.

 
තෝබියස්ගේ මංගල්ලෙ සම්ප්‍රදායික විදිහට දින හතක් නොකර දින දාහතරක් කරන්න මාමණ්ඩි තීරණය කළා මතකයිනෙ. දැන් ඒ දින දාහතර ගෙවිලා ගිහින්. එතනින් තමයි අද කතාව පටන් ගන්නෙ.

10.10.2015

හොබිට්ටා (The Hobbit)

පොත් ප්‍රදර්ශනයෙන් ගෙනාපු එක පොතක් කියවලා ඉවර කළා. J. R. R. Tolkien ගේ The Hobbit. The Lord of the Rings කතාවට ආරම්භය ලැබෙන්නේ මේ පොතෙන්. මම හිතන්නේ ගොඩක් දෙනෙක් මේ පොත කියවලා ඇති. පොතේ පිටපත් මිලියන 140ක් විකිණිලා තියෙනවාලුනෙ. 

මේ පොතේ මනඃකල්පිත ජීවි කොට්ඨාස කීපයක් ගැනම ලියවී තියෙනවා. එක් එක් ජීවීන්ට අනන්‍යවූ විවිධ ලක්ෂණ තියෙනවා. මම ඒ ලක්ෂණ මෙතන විස්තර කරන්නේ නෑ. පොත කියවලම බලන්න වෙනවා ඒවා දැනගන්න. මට මේ පොත කියවලා බලන්න හිතුවෙත් ඒ වගේ හේතුවක් හින්දා. දවසක් මම දවල්ට දෙපාරක් කෑවා කිව්වාම මාත් එක්ක වැඩ කරන කෙනෙක් ඇහුවා 'ඔයා හොබිට් කෙනෙක්ද?' කියලා. එතනින් තමයි කතාව කියවන්න ආසා හිතුනේ. අනික් කාරණාව මෙච්චර පොත් ගණනක් විකිණෙන්න නම් මේ පොත හොඳ එකක් වෙන්න ඕනෙ කියලා හිතුනා.

පොතේ කතානායකයා 'බිල්බෝ බැගින්ස්' කියන්නෙ 'හොබිට්' කියන ජීවී කොට්ඨාසයට අයිති ජීවියෙක්. මීට අමතරව 'ගැන්ඩල්ෆ්' කියන මායාකාරයත් තෝරින් ප්‍රමුඛ අඟුටුමිට්ටෝ දහතුන් දෙනෙකුත් ඉන්නවා.තෝරින්ට උරුමවෙච්ච රාජධානියේ අයිතිය ලබාගන්න මේගොල්ලෝ යන ගමන තමයි පොතේ තියෙන්නෙ. ඒ ගොල්ලෝ එක් එක් නපුරු වගේම යහපත් ජීවී කොට්ඨාස වල වාසභූමි පහුකරලා රාජධානිය සොයා යාමත් අවසානයේදී රාජධානිය අයිති කරගෙන සිටින මකරාගෙන් එය ලබාගන්නා හැටිත් පොතේ විස්තර වෙනවා.

“Where there's life there's hope.” 

9.25.2015

මා කියවූ චරිතාපදාන

“Truth is stranger than fiction, but it is because Fiction is obliged to stick to possibilities; Truth isn't.”      ― Mark Twain

ප්‍රබන්ධ වලට වඩා මම පෞද්ගලිකව චරිතාපදාන ප්‍රිය කරමි. සමහර ප්‍රබන්ධවල කෙළවර අනුමාන කළහැකි නිසාත් කෙතරම් රසවත් දෙයක් වුවත් මෙලොව සැබවින්ම සිදුවූවක් යැයි නොසිතෙන නිසාත් මම ප්‍රබන්ධ වලට එතරම් ඇල්මක් නොදක්වමි. නමුත් වන්දිභට්ට චරිතාපදානද ස්වයං ලිඛිත චරිතාපදානද ඇතිබැවින් 'සත්‍යය' පිළිබඳ දෙවරක් සිතාබැලිය යුතු අවස්ථා ද නැත්තේම නොවේ.

පහළින් දැක්වෙන්නේ මා කියවූ චරිතාපදාන වලින් මට මතක ඇති සිත්ගත් කිහිපයකි. ඒත් සමහරක පොතේ නම මතක නැත. තිබූ කරුණුද මතකයේ ඇත්තේ අඩුවැඩි වශයෙනි. ඒ නිසා පොත ගැන විස්තර කිරීම පසෙක තබා පුද්ගලයාගේ තොරතුරු ස්වල්පයක් කියන්නට අදහස් කළෙමි. එයත් කම්මැලි කාර්‍යයක් වූයේ ඒ ඒ පුද්ගලයන් පිළිබඳ විස්තර අන්තර්ජාලය තුළ සිංහලෙන් අඩංගු වීම නිසාය. එනිසා අදාළ තැනින් යම් උපුටා දැමීමක් කොට උපුටාගත් ස්ථානය කරා සබැඳියක් දැමුවෙමි. කැමති කෙනෙකුට පොත කියවීම පසෙක තබා අදාළ සබැඳියෙන් විස්තර ලබා ගත හැකිය.

ලී ක්වාන් යූ
මඩ ගොහොරුවක සිටි සිංගප්පූරුව කොළඹ තත්වයට ගෙන ඒමේ ඉලක්කයෙන් ඇරඹි ගමන නතරවූයේ කොළඹද පසුකරයාමෙනි. ඒ අසාහය කාර්‍යයේ නියමුවා සිංගප්පූරු හිටපු අගමැති ලී ක්වාන් යූ ය. පොතේ නම මතක නැතත් ඔහු මුල සිටම සිංගප්පූරුව ගොඩනැවීමෙහි දැක්වූ කාර්‍යයශූරත්වය පොතේ සඳහන් වී තිබිණි.මා මුලින්ම ඔහු ගැන දැනගත්තේ ධනාත්මක චින්තනය පිළිබඳ දේශනයකදීය. ඊට පසුකලෙක මා විමසා බැලීමේදීත් ඔහු ගැන දන්නෝ ඉතා අල්ප දෙනෙක් විය.


මහත්මා ගාන්ධි
මහත්මා ගාන්ධි පිළිබඳ නොදන්නෝ සිටිය හැක්කේ ඉතාම අල්පදෙනෙකි. එතරම්ම ඔහු ප්‍රසිද්ධ චරිතයකි.
දිරුබායි අම්බානි
ලෝ සුපතල බිලියනපතියන් වන අනිල් අම්බානි හා මුකේෂ් අමබානිගේ පියා, දිරුභායි අම්බානිය. රිලයන්ස් ඉන්ඩස්ට්‍රීස් ආරම්භ කිරීමේ කතාවයි. මනිරත්නම්ගේ ගුරු හින්දි චිත්‍රපටයට පාදක කොටගෙන ඇත්තේ මේ ජීවිත කතාවයි.

හිට්ලර් ගැන සඳහන් පොත් කීපයක්ම කියවා ඇත. විශේෂයෙන්ම හිට්ලර්ගේ ලේකම්වරියක විසින් රචිත පොත මා සිත්ගත්තේය.

මර්සලීන් ජයකොඩි පියතුමා
කතෝලික පියතුමෙක් වුවත් බෞද්ධ සංස්කෘතිය කෙරෙහිද සංගීතය කෙරෙහිද විශේෂ නැඹුරුවක් දැක්වීය.

එන්. එම්. පෙරේරා
එංගලන්තයේ විශිෂ්ට ආර්ථික මහාචාර්යවරයෙක් වූ හැරල්ඩ් ලැස්කි (Harlod laski) ගේ විශිෂ්ටතම ශිෂ්‍යා බවටද එන්. එම්. පත්විය. තම ගෝලයා ගැන මහා ඉහළින් කතා කළ හැරල්ඩ් ලැස්කි වරක් පැවැසුවේ ‘’එන්. එම්. පෙරේරා, එංගලන්තයේ උපත ලැබුවේ නම්, හේ එංගලන්ත අගමැති පදවිය හෝ මුදල් ඇමැති පදවියට පත්වන්නට බොහෝ දුරට ඉඩ තිබුණ බව‘යි. කෙසේ වුවද හේ වසර කීපයක් සිරිමාවෝ බණ්ඩාරනායක රජයේ මුදල් ඇමැති පදවිය ඉසුළුවේ ය. රටට හිතැති ප්‍රගතිශීලී යෝජනා රැසක් ඔහු දායාද කෙළේ ය. මෙහිලා මැණික් සංස්ථාව ස්ථාපනය කිරීම කැපී පෙනෙන ප්‍රගතිශීලී සමාජ සත්කාරයකි. (උපුටා ගැනීම)
ප්‍රභාකරන් උපන් ගමෙහි පිහිටි වැල්වැටිතුරෙයි මහා විද්‍යාලය, දහස්‌ ගණන් දරු දැරියන්ගේ නුවන් පෑදූ පාසලකි. එහිදී අ.පො.ස. (සා.පෙළ) දක්‌වා අධ්‍යාපනය ලැබුව ද ප්‍රභාකරන්ගේ සිත යොමුවූයේ ත්‍රස්‌තවාදී ක්‍රියා වෙතය. හුදෙකලාව සිටීමට නිතර උත්සුක වූ ඔහු කරාටේ, ජූඩෝ ක්‍රීඩාවලට උනන්දුවෙන් සහභාගි විය. (උපුටා ගැනීම)

1942 මාර්තු මස 20වනදා ඓතිහාසික කන්ද උඩරට කොත්මලේ පුරවරයේ මාස්වෙලදී මෙලොව එළිය දුටු පින්බර පුත් රුවන නමින්ලයනල් ගාමිණී දිසානායක නම් විය. දක්ෂ ව්‍යාපාරිකයකු වූ ඇන්ඩෲ දිසානායකයන්ගේත්, සමරතුංග වෙලගෙදර කුමාරිහාමිගේත් දෙවැනි දරුවා ලෙස මෙලොව එළි දුටු ගාමිණීට එම නම යෝජනා කර ඇත්තේ එවක යතුරුගහලියැද්ද පන්සලේ ලොකු හාමුදුරුවන්ව වැඩ සිටි දිඹුල සීලානන්ද ස්වාමීන්ද්‍රයන් වහන්සේ විසිනි. (උපුටා ගැනීම)



"මයිකල් රුදිගු පියතුමා, සම්ප්‍රදායික කතෝලික පියතුමෙකුගේ භූමිකාවෙන් මිදිලා විප්ලවීය විදිහට ජනතාවට සේවය කරන්ඩ උත්සාහ දරපු පියතුමෙක්. සාම්ප්‍රදායික ලෝගුව අතෑරලා සරම බැනියම ඇඳගෙන දුෂ්කර ගම්මානයක දිළින්ඳන් සොයාගෙන තමයි එතුමා යන්නේ. ඒත් ඒ වෙනුවට එතුමාව සොයාගෙන එන්නෙ වෙඩි උණ්ඩයක්.  ඒ උණ්ඩය යන්නෙ එතුමාගේ ජීවිතයත් අරගෙන. මේ එතුමාගේ කතාවයි. "

වීරප්පන්
කර්ණාටක ප්‍රාන්තයේ ගෝපිනාතම් ගම්මානයේ දී කූසේ මුනිස්වාමි වීරප්පන් උපත ලැබූයේ 1952 ජනවාරි 18 වැනිදාය. වන්නියාර් කුලයේ ගවයන් ඇති කරන පවුලක උපන් ඔහු කුඩා කල ගම්මානයේ ප්‍රකට වූයේ ‘මොලකායි’ යන නමිනි. පවුලේ අය හා ඥාතීන් දඩමස් හා සුදුහඳුන් දැව ජාවාරමේ ද නියැළි අය වූ අතර වීරප්පන් කුඩා කල පටන්ම එම ජාවාරම්වල යෙදුණු තම ඥාතියකු වූ ක්සේවියර් ගෞන්දර් ගේ සහායකයා ලෙස කටයුතු කළේය. (උපුටාගැනීම)


පියවරෙන් පියවර කණිෂ්ඨත්වයේ සිට ජ්‍යෙෂ්ඨත්වයට පැමිණ එක්සත් ජාතික පක්ෂයේ වත්මන් නායකත්වය හොබවන වික්‍රමසිංහ මහතා පක්ෂ විපක්ෂ බහුතර ගෞරවයට පාත්‍ර වන්නේ සියලූ ගුණයන්ගෙන් සපිරි නිකැලැල් මහත්මා දේශපාලනඥයෙකු වශයෙනි. අඩුවෙන් කතා කොට වැඩියෙන් වැඩ කිරීම ප්‍රායෝගිකව ලෝකයට පෙන්වා දුන් අවංක ජනතා සේවකයෙකු වූ හෙතෙම එක්සත් ජාතික පක්ෂයේ නායකත්වයට පත්වන්නේ 1994 දීය. (උපුටාගැනීම)


කොළඹ රාජකීය විද්‍යාලයෙන් අධ්‍යාපනය ලැබූ මොහු අධ්‍යාපනයට වඩා සිත යොමු කළේ කෙළි සෙල්ලම් සඳහාය. ටෙනිස්, කි‍්‍රකට්, පෝලෝ, බොක්සිං ,මල්ලවපොර පමණක් නොව අසුන් පිටයාමට ද මනා දස්කමක් දැක්වූ අතර මොහු නමින් ජෝන් ලයනල් කොතලාවල නම් විය.යුධහමුදා නිලධාරියකු වූ ජෝන් කොතලාවල මහතාගේත් ඇලිස් ආටිගල මැතිනියගේත් පුතකුව 1895 දී බණ්ඩාරගම කොතලාවල දී උපත ලද ජෝන්ට වයස අවුරුදු එකොළහ පමණ වන විට පියා මියගියේය. (උපුටාගැනීම)

ජෝන් කොතලාවල කතාවේ සමහර තැන් මට අපැහැදිලි විය. ඒ පියාගේත් පුතාගේත් දෙදෙනාම ජෝන් කොතලාවල වූ බැවිනි. මම හිතන්නේ නෙයිනගෙ සූදුපොළ වැටලුවේ ජෝන් කොතලාවල පියාය. 

කියමු බලන්න දන්න මේ වගේ පොත් ටිකක් ගැන විස්තර.

9.23.2015

කබරගොයි තලගොයි අරාබිය ලංකාව

කබරගොයා වර්ෂන්

බලන්න මේ වීඩියෝව හොඳට බලන්න
ම්ලේච්ඡ තම්බි මිනීමරන විදිහ බලන්න
උන් හදන්නෙ මෙහෙත් අරාබියක් කරන්න
ලංකාවම බේරගන්න ශෙයාර් කරන්න

ප්‍රසිද්ධියෙ ගල් ගහනා විදිහ බලන්න
ප්‍රසිද්ධියෙ බෙලි කපනා විදිහ බලන්න
ප්‍රසිද්ධියෙ එල්ලා මරන විදිහ බලන්න
උන් එන්නේ මෙහෙටත් ශරියාව ගෙනෙන්න

රැකගන්නට අපෙ මව් බිම පෙරට එන්න
එහෙමත් පුළුවන්ද මෙහෙම දඬුවම් දෙන්න
මෙලේච්ඡ තම්බි හැතිකරේම අතුගා දාන්න
වැඩි වැඩියෙන් වීඩියෝව ශෙයාර් කරන්න

තලගොයා වර්ෂන්

අනේ පව් අහිංසක පොඩි එකෙක් මරාදාලා
කළ එවුන් මරන්නෝනා ප්‍රසිද්ධියෙ ගල් ගහලා
ලංකාවෙ කසිකබල් නීතියත් වල්වැදිලා
බලන්නකො අරාබියෙ මරණ හැටි ගල් ගහලා

හොරකමක් කෙරුවොතින් දමනවා අත කපල
මිනිහෙක්ව මැරුවොතින් මරන්නේ බෙලි කපලා
අපචාර කළෝතින් මරන්නේ ගල් ගහලා
ඒ වගේ තිබ්බ නම් මෙලහකට රට හැදිලා

රැකගන්න ලංකාව එන්න ඔබ හැම පෙරට
අරාබියෙ වගෙ නීති ඕනෑ අපෙ රටට
වැරදි කළ හැමෝවම ප්‍රසිද්ධියෙ එල්ලන්න
නිකම් නම් යන්නෙපා ශෙයාර් කරලා යන්න

9.10.2015

කියවීම හුරුවීම හා නුහුරු වීම

සාහිත මාසය වෙනුවෙන් යමක් ලිවිය යුතුයැයි සෑම සාහිත මාසයකදීම සිතෙන මුත් මෙතෙක් ඊට ඉඩක් ලැබී නැත. අද මේ පුරවන්නේ ඒ අඩුවයි.

අපේ අම්මා කියන පරිදි මට අකුරු කියවා ඇත්තේ අපේ අම්මාය. එයින් 'පොත්තොයියෝ පත්තොයියෝ' කියවීම පටන්ගත් මට මුලින් පොතක් පතක් ලැබුනා කියා මතකයේ ඇත්තේ දිනක් තාත්තා වැඩ ඇරී එද්දී ගෙනා 'කැකුළු' පත්තරයයි. එකල අවුරුදු තුනක් හෝ තුන හමාරක් වයසැති මා සාලයේ මුනින් අතට වැතිරී සිටියදී අඳුරේම තාත්තා පැමිණි ආකාරයත් බයිසිකලය නවත්වා මට පත්තරය දුන් ආකාරයත් මට අද වගේ මතකය. මා ඉතා ආසාවෙන් පත්තරය ගත් හැටිද බිම පෙරළීගෙන රූප පාට කළ හැටිද තවමත් අද ඊයෙ මෙනි. එහි මැද පිටුවේ ඇති කතන්දරය තනිවම කියවාගත නොහැකිවූ මා හට අසා සිටිනු පිණිස තාත්තා එය කියවූයේය. සතියෙන් සතිය ලැබෙන පත්තර ගණන වැඩිවෙද්දී මට කියවිය හැකි ප්‍රමාණයද ඉබේම වැඩිවී තිබිණි.

මොන්ටිසෝරියේ අවසානයත් සමඟම සතිපතා ලැබුණු 'කැකුළු' පත්තරයද නොලැබී ගියේය. කුඩා කල සිට සහජයෙන්ම පොත් වලට තිබූ ඇල්ම එක දෙක වසර වෙද්දී සෑහෙන තරමකට දියුණුවී තිබිණි. ඒ කාලයේ නිවසේ තිබූ එක පොතක්වත් මා අතහැරියේ නැත.විශේෂයෙන්ම අම්මා සතුව තිබූ අච්චු පොත් සියල්ලම මා කියවා දැමූයේ දෙක තුන වසරට පැමිණීමටත් කලින්ය. 

තාත්තා ලබාදුන් චීන සිතුවම් සහිත කතන්දර පොත් කිහිපයක්ද මා සන්තකයේ විය. විජය පත්තරෙන් නොමිලයේ ලැබූ කතන්දර පොත් කිහිපයක් මා සන්තක වූයේ අපේ පුංචිගෙනි. තාත්තා සමඟ පාන්දර නැගිට ඉස්කෝලෙ ගිය සමයේ මා නිරතුරු සිටියේ අච්චිලාගේ නිවෙස්වල බැවින් මාමලාගේ පුංචිලාගේ අච්චු පොත් සියල්ලද මගේ කියවීමේ රුචිය වර්ධනය කළේය. 

මම හතරවසරේදීම  පල්ලියේ අන්නාවි මහත්මාගේ ලිපි ලේඛන වැඩ කටයුතු කළෙමි. ඇත්තටම මෙය කිසියම් ලාභ ප්‍රයෝජනයක් තකා කළ දෙයක් නොව තනිකරම අන්නාවි මහත්මයාට උදව් කිරීමකි. එවකට හැත්තෑ ගණන් හෝ අසූ ගණන් වයසේ පසුවූ එතුමාගේ ඇස් වල සුද ඉවත්කිරීමේ ශල්‍යකර්මය අසාර්ථක වී සදහටම ඇස් පෙනීම නැතිවී තිබිණි. නමුත් එතුමා එයින් අධෛර්‍ය වූ පුද්ගලයෙකු නොවේ. පල්ලියේදී වෙනදා පොත බලාගෙන කී යාච්ඤා එතුමා කට පාඩමින් කීමට ඉටාගත්තේය. යාච්ඤා මට කියා උච්චාරණය කරවා කටපාඩම් කරගැනීම නිසා ඒවා ඉබේම මට කටපාඩම් විය. කතෝලික පුවත්පතක්වූ ඥානාර්ථ ප්‍රදීපය පුවත්පත එතුමාට ඇසෙන සේ හඬ නගා කියවීමේ ප්‍රතිඵලය වූයේ නොදැනුවත්වම කියවීමේ හැකියාවද දැනුමද වර්ධනය වීමයි. සමහර දිනවල වදයක් ලෙස සිතුවද එහි වටිනාකම තේරෙන්නේ දැන්ය.

මීට අමතරව එදිනෙදා මට මුණගැසුණු පොත් කියවීමි. සතිපතා විජය පත්තරය කියවීමි. විශ්ව විද්‍යාලයේදී චරිතාපදාන කියවීමි. එහෙත් එක පොතකදී හැර කෙකලකවත් පිස්සුවෙන් වගේ පොත් පසුපස හඹා යනතරම් ඇබ්බැහියක් මට නොවීය. ලැබෙන පොතක් පතක් කියවීමෙන් මම සෑහීමට පත්වීමි.

එහෙත් දැන් පොත් කීයක් ලැබුනද කියවීමේ රුචියක් නැත. බ්ලොග් කියවීමට ඇබ්බැහිවී සිටිමි. නැවත පොත් සොයා යායුතුය.

9.04.2015

නූලෙන් බේරුණු කිඳිගොඩ මංගල්ලෙ

මෙය ලියන මොහොතේ මගේ මතකය දශක එකහමාරක පමණ අතීතයට දිව යයි. එකල අපි යාන්තම් සා.පෙ. ලියූ කොල්ලන් වීමු. ජීවිත සරලව සැහැල්ලුවෙන් ගෙවා දැමීමු. ලිවීමට යන සිද්ධිය වන විට අප ගෙවමින් සිටියේ කැලැන්ඩරයේ නවවෙනි මාසයයි. දිනය හරියටම මතක නැතත් එදින සැප්තැම්බර් මස පළමුවැනි ඉරිදා යැයි කිව හැකි වන්නේ කිඳිගොඩ මංගල්ලය සෑම වසරකම සැප්තැම්බර් මස පළමුවැනි ඉරිදාට යෙදෙන බැවිනි.

8.31.2015

මං හිතුවා

"බාස් ගුණේ මැරිලලු"

"මොකක්ද වෙලා තියෙන්නෙ?"

"එල්ලිලාලු මැරිලා තියෙන්නෙ"

"ඒ මොකද ඌ හොඳට වැඩපල කරගෙන හිටියනෙ."

"ගෑණි වෙන මිනිහෙක් එක්ක ගිහින් කියන්නෙ"

"හපෝයි දෙයියනේ අතක් බැරුව ඉඳගෙනත් හොයාගෙන කකා අම්මට සළකගෙන හිටපු එකා. මේ කොහෙවත් යන ගෑනියෙක් හින්දා කරගත්තු විනාසයක්"

"මං හිතුවා.... මං හිතුවා ගෑණිගෙ රොම්පිය වැඩිවේගන එද්දි ඔයවගේ දෙයක් තමයි කියලා."

"ඔව්. ඒකි ගමට එනකොට හරියට අඳින්න ඇඳුමක් නෑ. හඩු පෙරෙනවා. අන්තිමට අරූ මැරිලා මැරිලා හොයාගෙන එන එකෙන් එක එක විච්චූර්ණ කරන්න ගත්තා. මොඩ් උනා."

"පව් ඒකා. අර කොහෙවත් යන වනචර ගෑනියෙක් කරේ එල්ලගෙන නිකන් විනාස උනා. අම්මටත් සළකගෙන කොහොම හිඅපු එකෙක්ද? හ්ම්ම්ම්"

"හවසට ඒ පැත්තෙ ගිහින් එමු නේද?"

==================================================================

"බාස් ගුණේලගෙ ගෙවල් පැත්තෙ යන්නෙ නැද්ද?"

"ඒ මොකටද?"

"ඇයි දන්නෙ නැද්ද ආරංචිය. පාලම ගාව ගුණේ නැතිවෙලා."

"ඒ ගුණේ නෙමෙයි නැතිවෙලා තියෙන්නෙ. අර බාස්ලාට අත් උදව් දිදී හිටපු ගුණේ"

"ආහ්. ඇත්තද? මේ අපේ අත බැරි ගුණේ නෙමෙද?"

"මං ඒත් හිතුවා. ගුණේගෙ ගෑණි එහෙම නරක ගෑණියෙක් නෙමෙනෙ. දුප්පත් කමට හැදිච්චි එකී. දීග එනකොටත් බොහොම දුප්පත්. ඒත් ඔය යස අපූරුවට ගේදොරත් බලාගෙන කාලා ඇඳලා ඉන්නෙ."

"ඔව් එයා හරිම හොඳයි. දැකපු තැන හිනාවෙනවා කතාකරනවා."

"කට්ටිය ගුණේගෙ ගෑණි දාලා ගිහින් කියනකොටම මම හිතුවා එකත් එකටම කාගෙහරි බොරුවක් කියලා"

"දැන් එතකොට මැරිලා තියෙන්නෙ අත් උදව් දීපු ගුණයා?"

"ඔව් ඔව්"

"ආයෙ අහන්ඩ දෙයක් තියෙනවයෑ. ඌ ගෑණිව ගෙනාවෙ මුඩුක්කුවකින්ද කොහෙදනෙ. මුඩුක්කුවල ගෑණු ඔහොමමයි. රොම්පිය දාගෙන ඉන්නෙ කාත් එක්කද එල්ලෙන්නෙ බලාගෙන."

"පව්. කුලියක් මලියක් කරගෙන හිටපු කොල්ලා"


8.09.2015

ෆ්‍රෙන්ච් ටෝස්ට් (French Toast) හදමු

බ්ලොග් ජීවිතයේ පළවෙනිපාරට ඔන්න කෑමක් හදන හැටි ලියන්න යන්නෙ. මීට කලින් මම එහෙම එකක් ලියලා නැද්ද?.. ම්.ම්ම්ම්.. මතකනම් නෑ. 

මේ කෑම නම් හදලා ටිකක් කල්. විස්තරෙත් ලියලා තිබ්බට පබ්ලිශ් කරන්න වෙලාවක් හම්බුනේ නෑ. ඉතින් අද තමයි අඩුපාඩු ටිකත් හදලා පබ්ලිශ් කරන්න හිතුවේ.

හදන්න යන කෑමෙ නම තමයි ෆ්‍රෙන්ච් ටෝස්ට්. සිංහල නමක් නම් නෑ. කැමති නම් ප්‍රංශ රෝස්පාන් කියලා දාගමු. කෑම හදන්න කලින් මම විකියෙ පොඩ්ඩක් කරක් ගහලා බැලුවා. මේ ජාතියෙ පාන්, බිත්තර, කිරි පාවිච්චි කරපු කෑමක් ක්‍රි.ව. 4වෙනි 5වෙනි ශතවර්ෂවල තිබුණු Apicius කියන රෝමානු කෑම වට්ටෝරු එකතුවේ තිබුනාලු. ඒ ඇරුනාම මධ්‍යතන යුගයේ ජනප්‍රිය කෑමක්ලු ෆ්‍රෙන්ච් ටෝස්ට්. 

8.07.2015

කුලේ මාමා සමඟ නැගිටිමු

'කුලේ මාමා', නම කියූ සැණින් අහල පහල ගමේ ගොඩේ කොයි කවුරුත් ඔහු හඳුනයි. ගමේ තිබූ එක් වෙළඳසලක හිමිකාරීත්වය දැරීමටත් වඩා ගමේ තිබූ එකම එක මරණාධාර සමිතියේ සභාපති වීම ඔහුගේ ප්‍රසිද්ධියට බලපෑ විශාලම කාරණාව විය. මීට අවුරුදු කීපයකට පෙර කුලේ මාමා  ඇතුළු ගමේ කීපදෙනෙකුගේ යෝජනා ස්ථිරත්වයෙන් ආරම්භ වූ මරණාධාර සමිතියේ මුල්ම සභාපතිවරයා වූයේ කුලේ මාමාය.

8.05.2015

අලුත් බොගක් - සුරංගගේ ලෝකය

මීට ටික කාලෙකට කලින් මම නමක් ගමක් නොදන්නා පුද්ගලයෙක් නිතරම කමෙන්ට් හරහා දුරකථන අංකය ඉල්ලා සිටියා. මම ඉතින් ඇඩ්‍රස් එක දුන්නා. ඒ කිව්වෙ ඊ-මේල් ඇඩ්‍රස් එක. පස්සෙ ඔහු ඉල්ලා සිටියේ අලුත් බොගයක් පටන් ගන්නට උපදෙස්. මම කෙලින්ම මාතලන්ගේ පන්තියට පාර පෙන්නුවා. 


මම හිතන්නේ ඔහුට මගේ බ්ලොග හමුවෙන්න ඇත්තෙ ශු. අන්තෝනි මුනිතුමා ගැන තොරතුරු හොයද්දී වෙන්න ඕනා. මොකද ටික දිනකට පස්සේ මගේ බ්ලොගයෙන් තොරතුරු අරන් හදපු තොරණක පින්තූරයක් මට එවලා තිබුනා. 

ගිහින් බලන්න ඒ මීගමු කොල්ලාගේ බ්ලොග් එක.

සුරංගගේ ලෝකය.

5.25.2015

ගුරු ගීතය හා රඹුටන් ගස්

මිලදීගත් රඹුටන් වල්ලෙන් එකිනෙක ගිලිහෙද්දී ඇයත් මමත් මාවත අද්දර දොඩමළුවී සිටියෙමු. රඹුටන්වල මිහිරටත් වඩා කීමෙහි බිණීමෙහි මිහිර ගතසිත වෙලා ගොස් තිබිණි.

ඈ තවත් එක් රතුවන් රඹුටමක් ගෙන ලෙලි හැර කටේ රුවා ගත්තාය. මම එය ඇඟේ දකුණු කම්මුලටත් වම් කම්මුලටත් මාරුවනු බලා සිටියෙමි. තවත් මොහොතකින් මදයෙන් මිදුණු ඇටය බිමට පතිත විය.

"දැන් මෙතන ඇට දාලා ගිහින් ආයෙ එන්නකොට රඹුටන් ගස් තියෙයි මෙතන"

"අර පොප්ලර් ගස් වගේද?" ඇය සිනහාසෙමින් පැවසුවාය.

"පොප්ලර් ගස්?"

"ඇයි අර ගුරුගීතයෙ පොප්ලර් ගස්? කියවලා නැද්ද ඒක?" ඈ විමතියෙන් මා විමසුවාය.

"ම්හ්හ්හ්"

එතනදි ගුරුගීතය ඇසීමි. අද කියවීමි.

පරණ මතක අලුත් වන්නට යළිත් දුයිෂෙන්ට අල්තීනායි හමුවේවා. පාර අද්දර රඹුටන් ගස් පැළවේවා.

    “අල්තීනායි, දැන් උඹයි මමයි එක වැඩක් කරමු.“ යි ඔහු මඳ සිනා පෑවේ ය, “අපි මේ පැලෑටි දෙක හිටවමු. මේ පැලෑටි දෙක වැඩී ගොස් ලොකු ගස් වී, ශක්තිමත් වෙන්නා වගේම නුඹත් හැදිලා, වැඩිලා, හොඳ කෙනෙකු වේවි. නුඹේ උපන් වෙලාවේ හැටියට නුඹට එහෙම හොඳ කලදසාවක් යන බව මට හොඳටම විශ්වාසයි. නුඹ තවම ලපටියි. හරියට මේ පොප්ලර් පැලෑටි වගේ. අල්තීනායි අපි දැන් මේ පැලෑටි හිටවමු හොඳේ! නුඹට ඉතා හොඳින් ඉගෙන ගන්ට වාසනාව ලැබේවායි කියා පතාගෙන පැලෑටි හිටවමු....“

4.14.2015

සලාත් (ප්‍රවේසම් වන්න)

(ගත්තෙ මෙතනින්)
ජීවිතය විටින් විට අපට පාඩම් කියාදෙයි. වරෙක පොතෙන් පතෙන්ද, තවත් වරෙක තමන්ගේම අත්දැකීම් තුලින්ද, තවත් වරෙක අන්‍යයන්ගේ අත්දැකීම් ඇසුරෙන්ද අපි පාඩම් උගන්නෙමු. විටෙක එකම පාඩම කිහිපවරක්ම උගන්නෙමු. කෙටිකලක් තුළ පිරිසකට ස්වකීය අත්දැකීම් තුළින්ද තවත් පිරිසකට අන්‍යයන් දෙස බලාද පාඩම් ඉගෙනගැනීමට සැලස්වූවෙකි, සලාත්.

නූස් නොමිටි සාමාන්‍ය ප්‍රමාණයේ දේහයකින් යුක්තවද මනාව නඩත්තු කළ කෙස්වැටියකින් හා රැවුළකින්ද යුක්තවූ ඔහු අන්‍යයන්ට ප්‍රියමනාපව පෙනෙන ආකාරයෙන් ඇන්ඳේය. පැලැන්ඳේය. පාරිභෝගික කටයුතු පිළිබඳ නිලධාරියෙක් ලෙස මීට වසරකට දෙකකට පමණ පෙර අප ආයතනයට ආ ඔහු අවුරුදු විසිගණන්වල සිටිනා බවක් පෙන්වීය. ඔහුට අනුව ඔහුගේ වයස විසිතුනකි. ඔහුට අනුව?

4.13.2015

ඒ අහිංසක මනුස්සයා මොනවා කරන්න මහත්තයෝ?

"ටී එකක් දෙන්නද සර්" ඒ ඔහු මුණගැසුණු පළමුවෙනි මොහොතයි.

මා සේවය කරන ආයතනයේ දැන් මා සේවය කරන තනතුර වෙනුවෙන් සම්මුඛ පරීක්ෂණයට ගොස් සිටියෙමි. ඒ අතරතුර කාලයේදී තේ විරාමයද එළඹ තිබූ හෙයින් තේ සාදන්නා විසින් මටද තේ පිරිනැමීමට සූදානම් විය.

"බොහොම ස්තුතියි. මම තේ බීලා ආවෙ" මම ස්තුතිපූර්වකව එය ප්‍රතික්ෂේප කළෙමි.

"කමක් නෑ සර්. බොන්න"

එහෙත් මගේ දෙවෙනිවර ප්‍රතික්ෂේප කිරීම හමුවේ තේ සාදන්නා පිටව ගියේ ඔහුව ප්‍රතික්ෂේප කළාක් බඳු මුහුණක් මවා ගනිමිනි.

ඒ සම්මුඛ පරීක්ෂණයෙන් එතෙර වූ මා මෙහි වැඩට ආවෙමි.

ගුණපාල, ඒ ඔහුගේ නමයි. නූස් නොමිටි මධ්‍යම ප්‍රමාණයේ ශරීරයක් තිබූ ඔහුව කවුරුත් ඇමතුවේ 'ගුණේ' නමිනි. ඒ ආදරේට නොව කටේ ලේසියට වියයුතුය.

මම කොයි තරාතිරමක පුද්ගලයෙකු වුවත් ඔවුන් මිනිසුන් ලෙස සිතන්නෙමි. ආයතනයේ පහළ සේවකයන් වුවත් මට වැඩිමල් නම් කටපුරා අයියේ කිව්වෙමි. එම නිසා ඔහු මට 'ගුණපාල අයියා' නම් විය. එහෙත් එම ආමන්ත්‍රණයම වැඩිකල් කළ නොහැකි වූයේ එය ඔවුන් ගෝනි නැතුව කරේ නැඟීමට කාරණාවක් කරගන්නා බැව් පෙනීගිය නිසාවෙනි. එහෙත් නිකම්ම ගුණේ කීමටද මට සිත් නොදෙයි. ඒ නිසා මම දැන් නමක් ගමක් ආමන්ත්‍රණයකින් තොරව කතා කරමි.

පසුකාලීනව මම නිරීක්ෂණය කළ පරිදි ගුණපාල රැකියාවට අලුත පැමිණෙන අයවළුන් හා කුළුපග වීමට උත්සාහ කරයි. ඊළඟට හෙමින් හෙමින් තම දුක්ගැනවිලි ඉදිරිපත් කරයි.

"මට ළමයි හතරක් ඉන්නවා මහත්තයෝ. හතරදෙනාම ඉස්කෝලෙ යනවා. මම හරිම අමාරුවෙන් උගන්වන්නෙ. අපිට නැති උනාට අපේ ළමයින්ටවත් හොඳට උගන්වන්න ඕනනෙ. ඔය කුමාරි මැඩම්ලා, රුවන්ති මැඩම්ලා මට හරියට උදව් කරනවා. ඒගොල්ලො පඩි ගත්තම මට ගානක් දෙනවා ළමයින්ට උගන්වන්න. "

සෑම නවකයෙකුටම මේ දුක්ගැනවිල්ල අසන්නට සිදුවෙයි. සමහර දිනවලදී අහවල් සර්, අහවල් මැඩම් දුන්නා කියා මුදල් ද ගෙනත් පෙන්වයි. ඒ දැක මා කට කොනකින් සිනාසී ඉවත බලාගන්නේ ඔහුගේ මෙවන් ප්‍රකාශ ද මතකයේ ඇති බැවිනි.

"ගේ හදන්න ගත්තා සර්. ගේ නම් ලොකුවටම හදනවා අඩුම ගානේ හැම ළමයටම කාමරයක් තියෙන්න ඕනනෙ. "

"මුළු ගේම ටයිල් කරනවා. හොඳම ටයිල් එක දැම්මෙ."

"ගැහැව්වා වැරෙන්ඩා එක. කනු දොළහයි."

තවත් දිනෙක පැමිණ ගෙට ගත් ණය පියවීමට ඇතිබව කියමින් පසුතැවිලි වෙයි. මම කිහිපවිටක් මුදල් කළමනාකරණය ගැන උපදෙස් දෙන්නට ගියෙමි. ඒවා අවසන් වූයේ මට ආර්ථික විද්‍යාව ඔහුගෙන් ඉගෙන ගැනීමෙනි. මාමාගේ පාක්ෂිකයෙකු ලෙස මාමාව ඔහු අපූරුවට අනුගමනය කරයි.

ටික දිනකට පසු රටේ එළවළු හිඟයක් ඇතිවී එළවළු මිල ඉහළ ගියේය. බත් විකුණන්නෝ එළවළු රහිතව වෙන වෙන ආදේශක යොදා සකස් කළ බත් කට හරියේ තියන්නට බැරි විය.

"බත් එක නම් කටේ තියන්න බෑ. එක එළෝලුවක්වත් නෑ. සෝයයි පරිප්පුයි අඹයි මල ජරාව"එක් දවසක් මම කීවෙමි.

"එළෝලු ගණන්නෙ මහත්තයා. එළෝලු විතරක්යැ දැන් බඩු ඔක්කොම වගේ ගණන්. අපි මේ දවස් ටිකේම කොස් තම්බගෙන තමයි වේල ශේප් උනේ"

"ගුණපාලලාගෙ ආණ්ඩුව තමයි ඉතින්"

"එහෙම කියන්න එපා මහත්තයා. කඩකාරයො බඩු ගණන් වැඩි කළාට ඒ අහිංසක මනුස්සයා මොනවා කරන්නද?"

ගුණපාල වනාහි මාමාගේ පශ්චාත්භාගය වුවත් ලෙවකන්නට සූදානම් බව මම දැන සිටියෙමි. "ඒකත් ඇත්ත එහෙනම් අටවෙනිදා උදේම හොඳ කොස් හැළියක් තම්බන් කාලා ගිහින් මාමාට කතිරෙ ගහලා එන්න මේ වගේ වැඩි වැඩියෙන් කොස්ම අපිට කන්න ලැබේවා කියලා"

ගුණපාලගේ මුහුණ ඡන්දෙන් පසු මාමාගේ මුහුණ මෙන් විය.

තෝබිත්ගේ කතාව 5 - තෝබියස්ගෙ මංගල්ලෙ

තෝබිත්.. ආයෙත් කාලෙකට පස්සේ. මට නම් හිතෙන්නෙ කට්ටියට මුල ඉඳලම කතාව මතක් කරන්න වෙයි වගේ. කතාව ලියාගෙන ගිය මට කතාව ඉවර නැතිබව අමතක උනානම් කියවපු ඔයාලා ගැන කවර කතාද? හැබැයි එහෙමම කියන එකත් නරකයි. සමහර පාඨකයො මග තොටේ හම්බුනාමත් මේ කතාව ඉවර කරන්නේ නැද්ද කියලා ඇහුවා. ඔන්න ඒ අය ඔක්කොමත් මතක් කරගෙන කතාවෙ පොඩි සාරාංශයක් කියන්නම්. කතාව මුල ඉඳලා කියවන කෙනෙකුට බාධාවක් නොවෙන්න කෙටිම කෙටි සාරාංශයක් තමයි කියන්නෙ.

අපේ කතාවේ කතානායකයා තමයි තෝබිත්. එයා බොහෝම දැහැමි කෙනෙක්. ඒ වගේම අසල්වාසීන් සමඟ බොහොම සුහදව හිටපු දුප්පතුන්ට උදව් කරපු කෙනෙක්. ඒත් දවසක් ඉතාමත් අවාසනාවන්ත විදිහට තෝබිත්ගෙ ඇස් දෙක අන්ධ වෙනවා. ඒත් එක්කම තෝබිත්ගේ සැප සම්පත් ටිකෙන් ටික දියවෙලා යන පටන්ගන්නවා.

අන්තිමේදී තමුන්ගෙ මරණය ළඟ බව තේරුම් යන තෝබිත්, තමුන්ගෙ පුතා වෙච්චි තෝබියස්ව කැඳවලා ඊට අවුරුදු ගණනකට කලින් මිදියාවේ වාසය කරන ගබයෙල් ගාව පරිස්සමට තැබූ රිදී කාසි ගැන කියනවා. ඒ වගේ මඟපෙන්වන්නෙකු සමඟ ගොස් ඒවා නැවත ගෙන එන්නටත් උපදෙස් දෙනවා.

තමුන්ට මඟපෙන්වන්නෙකු සොයායන තෝබියස්ට මුණ ගැහෙන්නෙ දෙවියන් වහන්සේ විසින්ම එවාපු රපියෙල් දේව දූතයාව. ඔහු දේවදූතයෙකු බව නොදැන ඔහුගේ මඟපෙන්වීම ඔස්සේ තෝබියස් ගමන ගිය හැටි තමයි මම කිය කිය හිටියෙ.

මේ ලින්කු වලින් ගිහින් කියවලා එනවානම් කතාව හොඳින් තේරුම් යයි.

3.03.2015

නයාගේ කුණු කෑ දයා

"ගරුතර ස්වාමින්වහන්ස, අන්‍යාගමික පූජකවරුනි, මා හිතවත් මන්ත්‍රීවරුනි, නෝනාවරුනි, මහත්වරුනි, ආදර දරු දැරියනි, වසර ගණනාවක් තිස්සේ අපිට ප්‍රශ්නයක් වෙලා තිබ්බ කුණු ප්‍රශ්නය ධන උල්පතක් කරගැනීමට අවස්ථාව දැන් අපිට උදාවෙලා තියෙනවා. මෙතෙක් කලක් අපි කුණු කුණු කියලා එළියට විසිකරපු කුණු, සල්ලි කරගැනීමට අවස්ථාවක් උදාවෙලා තියෙනවා.

අපි, ඒ කිව්වෙ ඔබත් මාත් ඇතුළු අපේ ප්‍රාදේශීය සභාව මේ සංවිධානයත් එක්ක එකතුවෙලා අද ඉඳන් කැළි කසල ප්‍රතිචක්‍රීයකරණය කිරීමේ ව්‍යාපෘතියක් ආරම්භ කරනවා. එහි සමාරම්භක කටයුත්ත හැටියට තමයි මේ වෙන් වෙන්ව කුණු දැමිය හැකි බහාලුම අපි ඔබගේ මංසංධියේ පිහිටුවන්නෙ.

අපි ඔක්කොම කැපවෙලා ගමක් ගමක් ගානේ මේ විදිහේ බහාලුම් සවිකරලා මේ කාර්‍යය පටන්ගන්නවා. ඒත් ඒ කාර්‍යය ඉදිරියට ගෙන යාමේ වගකීම තියෙන්නෙ ඔබගේ අතේ. මීටපස්සෙ කවුරුත් ගෙදර ඔක්කොම කුණු එකට එකතු කරන්න එපා කියලා ආයාචනය කරන්න කැමතියි. ප්ලාස්ටික් පොලිතින් වගේ දේවල් වෙනම එකතු කරගෙන ඇවිත් ඔය කහ පාටින් තියෙන කුටියට දාන්න. වීදුරු කෑලි කොළ පාට එකටත් කඩදාසි නිල් එකටත් දාන්න. අනික් ඔක්කොම අළු පාට කුටීරයට දාන්න.

අපේ ප්‍රාදේශීය සභාවෙන් වෙන් වෙන් වශයෙන් මේවා එකතු කරගෙන යන්නයි කටයුතු යොදලා තියෙන්නෙ. ඒවා අපි මුදල් කරලා ප්‍රදේශයේ යටිතල පහසුකම් නැංවීමට අපි කටයුතු කරනවා. එතකොට ප්‍රතිපාදන නෑ කිය කිය ලත වෙවී ඉන්න දෙයක් නෑ. කාණු පද්ධතියක් ඕනා පිරිසකට කාණු පද්ධතියක්, පාරට තාර ටිකක් දාගන්න ඕනා කෙනෙකුට තාර ටිකක් එතකොට ඉක්මණින්ම ලබාදෙන්න අපිට පුලුවන් වේවි. "

නයා( නයන )  සභාපති තුමාගේ එවදන් රැව්පිළිරැව් දුන්නේ අසල මංසන්ධියක කසල බහාලුමක් විවෘත කළ දිනයේදි. පැමිණ සිටි බොහෝ දෙනා සභාපතිතුමාගේ වදන් වලින් උද්දාමයට පත්වූ බව පෙනෙන්නට තිබුණි. දින කිහිපයක් ගතවද්දී එක් එක් වර්ගයන්ට අයත් කසල වෙන වෙනම කුටීර තුළ තැන්පත් වන්නට විය. සතියක් දෙකක් පමණ ජනතාව නියමාකාරයෙන් කටයුතු කළහ.

එහෙත් ඊළඟ සතිය වනවිට මුළු බහාලුමම එකම කුණු ගොඩකි. වර්ගීකරණය කැලේ ගොස් තිබුණි. 'ලංකාවෙ මිනිස්සුන්ට ඕනෑම දෙයක් මතක හිටින්නෙ සති දෙකයි.' එසේ කියා සිත සනසාගත නොහැකි වූයේ ප්‍රදේශයේ ජනතාව වෙනත් කතාවක් කී බැවිනි. 

"මොන වියාර්පුතිද පුතේ. අපි පණ දාගෙන වෙන් කොරලා කොරලා කුණු දානකන් ඉඳලා අර පහල ගෙදර දයාරත්නයයි ගෑණියි රෑට ඕකට බහිනවා. උදේට යකඩ, පොලිතින්, කාඩ්බෝඩ් පටෝගෙන යනවා විකුණන්ඩ. අනේ අපිට අමාරුවක් තියෙනවයැ නිකන් ඉන්න ඌව පෝසත් කරන්න."

නොබෝ දිනකින්ම ව්‍යාපෘතිය අල වීම ගැන නයා කිපී තිබිණි. කුණු බහාලුම එතන තවත් නොතිබුණු අතර සති කිහිපයකට කුණු ලොරියේ පැමිණීමද නවතා දමන ලදී. සමහරවිට නයා දයාගේ වැඩ නොදැන සිටියා වන්නටද පුළුවන.

2.19.2015

තමුන් ලව්වාම වැඩ කරවා ගැනීම හෙවත් Getting Things Done (GTD)

වැඩ ගොඩක් එකතු උනාම මට වැඩ කරන්න හරිම අමාරුයි. ඒ වගේ වෙලාවට කෝකද ඉස්සෙල්ලා කරන්නෙ කොතනින්ද පටන්ගන්නෙ කියලා හිත හිත කරන්න තියෙන වැඩ දිහා බල බල එහෙට මෙහෙට යනවා මිසක් එකක්වත් පටන්ගන්න හිතෙන්නෙ නෑ. ඉතින් ඔය දුර්වලතාවය මඟ ඇරගන්න හිතාගෙන මම කියවන්න පටන්ගත්තා ඵලදායිතාවය ගැන ලියවෙච්ච පොතක්. ඒකෙ නම තමයි "Getting Things Done - The Art of Stress-Free Productivity". David Allen කියන කතුවරයා තමයි ලියලා තියෙන්නෙ. ඉතින් මේ පොතෙන් මම ඉගෙනගත්තු කරුණු තවත් කාටහරි ප්‍රයෝජනවත් වෙන්නත් යථා කාලයේදී මටම කියවගන්න පුළුවන් වෙන්නත් හිතාගෙන ලියලා දාන්න හිතුවා.

2.09.2015

පිටකොටුව ප්‍රධාන වෙළඳ භාණ්ඩ අලෙවි මාර්ග (Shopping at Pettah)

මේ අවුරුද්දෙ පබ්ලිශ් කරන්න හිතාගෙන ලියන පළවෙනි පෝස්ට් එක. දැන් ඉතින් අහන්නෙපා පබ්ලිශ් නොකරන්නත් පෝස්ට් ලියනවද කියලා. මොකද මම එහෙම කිව්වෙ පබ්ලිශ් කරන්න හිතාගෙන ලිව්වත් මේ වෙනකන් පබ්ලිශ් කරන්න බැරිවෙච්ච පෝස්ට් එහෙමත් තියෙන හින්දා.

හදිසියේම මේ පෝස්ට් එක ලියලා දාන්න හිතුනේ අන්තර්ජාලෙ පීරලා හොයපු කාරණාවක් ජාලෙ නෑ කියලා තේරුනු නිසා. හොයපු කාරණාව තමයි කොළඹ පිටකොටුවේ බඩු ගන්න යනකොට ඒ ඒ බඩු ගන්න මොන මොන පාරවල්වලද යන්න ඕන කියන එක. කොළඹට ගිහින් ඇහුවාමත් දැනගන්න පුළුවන් වෙයිනෙ. ඒත් ඉතින් දැනගෙන යන එක හොඳයි කියලා තමයි හොයලා බැලුවෙ.

මමපොඩි පොත් පිංචකින් හොයාගත්තු කාරණා ටික ඔන්න ජාලෙට දානවා. ඕගොල්ලො දන්න කියන කාරණාත් දාලා පෝස්ට් එක වැඩි දියුණු කරන්න පුළුවන්නම් ඒක ලොකු උදව්වක්.මෙන්න මේවා තමයි මම හොයාගත්තෙ.

බෑග්, ඔරලෝසු, පාවහන් (පිරිමි )- මල්වත්ත පාර, 01 වෙනි හරස් වීදිය

විදුලි උපකරණ හා ලෙදර් වර්ග - කුමාර වීදිය

ගොඩනැගිලි ද්‍රව්‍ය - පරණ යොන් වීදිය

විසිතුරු භාණ්ඩ, වීදුරු භාණ්ඩ, පොලිතින් - චයිනා වීදිය

රෙදි - 2වෙනි හා 3වෙනි හරස් වීදි, කෙයිසර් වීදිය

රසායන ද්‍රව්‍ය - බංගසාල වීදිය

බෙහෙත් බඩු හා කේක් බඩු - ගබෝස් ලේන්

ආහාර (තොග ) - 4 වෙනි හරස් වීදිය

එළවළු - මැනිං වෙළඳපොළ, ඕල්කට් මාවත

කරවල - පෙරේරා මාවත

මංගල අරයුම් පත් - මැලිබන් වීදිය

මුද්‍රණ ද්‍රව්‍ය හා ලිපි ද්‍රව්‍ය - රෝහිනි 1වෙනි පටුමග

තරාදි හා ආයුධ වර්ග - 3 වෙනි හරස් වීදිය

විදුලි උපකරණ හා මැහුම් උපකරණ - 2වෙනි හරස් වීදිය

Updated:

විදුලි උපකරණ කොටස් හා ඉලෙක්ට්‍රොනික් කොටස් - 1 හරස් වීදිය

ඇඳුම් පැළඳුම් ( විසාකාමල්ස්, රන්ජනාස් වගේ මහා පරිමාණ ) - මේන් ස්ට්‍රීට්

වීදුරු, මුහුණ බලන කණ්නාඩි - කුමාර වීදිය

බයිසිකල්, කේක් බඩු - වේල්ල වීදිය

වායු රයිෆල් - වේල්ල වීදිය

රත්තරන් බඩු - හෙට්ටි වීදිය

කෘතිම මල් - බංගසාල වීදිය

කොස්මෙටික්ස්- (විළවුන් හා ආලේපන ) දෙවෙනි හරස් වීදියේ තියෙන අන්ඩග්‍රවුන්ඩ් කඩ
 
ඔන්න ඔය ටික තමයි මට හොයාගන්න ලැබුනෙ. නිතර දේවේලෙ කොළඹ රටේ ගැවසෙන කොළඹ ගෙදර වගේ ඇත්තන්ගේ දැනුම අපේක්ෂා කරනවා.

කලින් වතාවක කොළඹ ගිය වෙලාවක මූණදීපු ප්‍රශ්නයක් තමයි වාහනය නවත්වන එක. යෝක් වීදියෙ තිබ්බ රථගාලයි පාවිච්චි කරේ. එතන ඉඳන් සෑහෙන දුර පයින් යන්න උනා. ඊටවඩා ලේසි තැනක් තියෙනවද?

ප.ලි. : ඉරිදා දින බොහෝ වෙළඳසැල් වසා ඇත.
Related Posts Plugin for WordPress, Blogger...